Եգիպտոսում կատաղած ամբոխը սպանել է իսլամականների առաջնորդներից մեկի 16-ամյա որդուն

Եգիպտոսում կատաղած ամբոխը սպանել է «Մուսուլման եղբայրների» առաջնորդներից մեկի 16-ամյա որդուն. տեղեկացնում է mignews.com-ը:

Շարքիա նահանգի Քատավիա քաղաքում վեճ է սկսվել  16-ամյա Յուսեֆ Ռաբի Աբդելսալյամի եւ Facebook-ում իսլամականների քննադատներից մեկի միջեւ: Պատանին սկսել է ատրճանակից կրակել` նշան չբռնելով: Մի անցորդ սպանվել է , երկուսը` վիրավորվել: Դրանից հետո զայրացած մարդիկ շրջապատել են  Աբդելսալյամի տունը եւ պահանջել իրենց հանձնել տղային: Ընտանիքը հրաժարվել է դա անել եւ բարիկադավորվել է: Ոստիկանությունը չի կարողացել ցրել զայրացած մարդկանց, նրանք այրել են տունը, իսկ երբ խառնաշփոթի մեջ Յուսեֆը դուրս է եկել տանից, նրան բռնել են, մոտ 500 մետր քարշ տվել ու ծեծել` մինչեւ մահանալը:

«Մուսուլման եղբայրները» հայտարարություն են տարածել, որում նշում են, որ սպանությունը քաղաքական բնույթ չունի: