Գյումրու կրակոցները կանխամտածված չէին. Հովհաննես Մարգարյան

ՕԵԿ-ական պատգամավոր, գյումրեցի Հովհաննես Մարգարյանը համամիտ չէ այն տեսակետին, որ Գյումրին հանցագործ քաղաք է: Այս մասին նա ասաց Yerkir.am-ի հետ զրույցում եւ մի ուշագրավ հայտարարություն արեց. «Ավելի չխորացնենք այն միջադեպը, որն ինձ թվում է` պահի տակ է եղել»:

- Պահի տա՞կ է եղել:

- Չեմ կարծում, որ որեւէ ծնող կուզենա, որ իր երեխան նման միջադեպի մեջ ընկնի` կա'մ կրակի, կա'մ զոհվի:

- Պարո'ն Մարգարյան, ճի՞շտ լսեցի, Դուք ասում եք, որ պատահակա՞ն են եղել այդ կրակոցները: Օրը ցերեկով երեխայի աչքի առաջ մարդու վրա կրակում են:

- Ես հայտնեցի իմ կարծիքը, յուրաքանչյուրը կարող է իր կարծիքը հայտնել:

- Ձեր կարծիքով` եղածը պատահականությո՞ւն էր:

- Իհարկե: Որովհետեւ չեմ կարծում, որ յուրաքանչյուր ծնող կամ գերդաստան կանխամտածված փորձեն նման դեպք իրականացնել:

- Կրակոցը պատահակա՞ն է հնչել:

- Ես այդ կարծիքին եմ:

- Խոսվում է, որ Գյումրիում գողական երկու կլաններ կան, տեղյա՞կ եք:

- Ես կլանների մասին տեղյակ չեմ, որովհետեւ այսօրվա դրությամբ ես չգիտեմ` Դուք, կլան ասելով, ինչ նկատի ունեք:

- Ոստիկանապետի հայտարարություններին ինչպե՞ս եք վերաբերվում, մասնավորապես` նա ասել էր` արա', դուք պատգամավո՞ր եք, թե՞ գողական: Ի դեպ, նաեւ հայտարարել էր, որ պատգամավորները զանգահարում են փոխոստիկանապետին` փորձելով հարցեր լուծել:

- Ես կարծում եմ, որ պարոն Գասպարյանը մոտ ապագայում կհրապարակի կոնկրետ անուն, թե որ պատգամավորներն են զանգել:

- Դուք զանգահարե՞լ եք:

-Ես, իհարկե, չեմ զանգել, բայց, այդուհանդերձ, ուզում եմ ասել, որ ճիշտ կլինի` մոտ ապագայում հրապարակվեն զանգողների անունները… Ինչ վերաբերում է այսօրվա դրությամբ Գյումրին հանցագործ աշխարհի քաղաք անվանելուն, ասեմ, որ Գյումրին արհեստի ու արվեստի քաղաք է, ես հպարտ եմ` որպես գյումրեցի: Այսօրվա դրությամբ յուրաքանչյուրս երաշխավորված չենք նմանատիպ դեպքերից: Ես կարող եմ հարյուրավոր այդպիսի օրինակներ բերել այլ համայնքներում եւ այլ քաղաքներում:

- Սպանվողին`Շեկոյին եւ Քավոր Հարութին ճանաչո՞ւմ էիք:

- Ես մեր քաղաքում բոլորին ճանաչում եմ, ես բոլորի հետ նորմալ հարաբերությունների մեջ եմ, հարգանքով եմ վերաբերվում բոլորին եւ այսօրվա դրությամբ պատրաստ եմ անել եւ անելու եմ ամեն ինչ, որ համերաշխություն տիրի մեր քաղաքում, չշարունակվի այս ամենը:

- Գյումրեցի պատգամավոր Մարտուն Գրիգորյանի անունն էլ շոշափվեց այս պատմության մեջ:

- Ես որեւէ մեկնաբանություն չեմ անի:

- Նման դեպքերը սովորաբար լինում են նախկին քաղաքապետ Վարդան Ղուկասյանի կամ նրա բարեկամների մասնակցությամբ: Հնարավո՞ր է` իրավիճակը շտկվի, քանի որ այլեւս քաղաքապետ չէ:

- Գիտեք, ես չեմ ուզում մատնանշել կոնկրետ անձ, ով չի կատարել այդ ամենը, եւ ամեն ինչ բացահայտվել է: Վարդան Ղուկասյանի հետ կապված` մի բան կասեմ` ի՞նչ է, Վարդան Ղուկասյանը կուզենա՞ր նման բան լիներ, յուրաքանչյուր քաղաքացի, յուրաքանչյուր ծնող, յուրաքանչյուր տվյալ ազգի ներկայացուցիչ կուզենա՞ր նման դեպք արձանագրվեր: Իհարկե, ոչ:

- Այդ դեպքում ինչպե՞ս է պատահում, որ միշտ նման պատմությունների մեջ է ընկնում:

- Ես էլի եմ ասում` որեւէ մեկը պահի, ակնթարթի տակ իրականացված ինչ-որ դեպքից երաշխավորված չէ:

- Պարո'ն Մարգարյան, իհարկե, ներողություն եմ խնդրում, բայց, միեւնույն է, տրամաբանական չէ, որ դա ընդամենը պատահականություն էր` օրը ցերեկով պատահական չեն կրակում:

- Չշտապենք, իրավապահ մարմիններն ամեն ինչ կբացահայտեն: Ոչ միայն պատահական, այլ այդ պատահականությունը պահի տակ է լինում, ոչ թե` կանխամտածված: Իսկ դուք ասում եք` կանխամտածված է եղել, ծրագրավորված, չգիտեմ ինչ:

- Իսկ Դուք ասում եք, որ պատահական է եղել եւ ոչ կանխամտածված:

- Իհարկե:

-Բայց ախր որտեղի՞ց գիտեք, որ կանխամտածված չի եղել:

- Դա իմ կարծիքն է:

Զրուցեց ԱԳՆԵՍԱ ԽԱՄՈՅԱՆԸ