Գասպարյանն ինձ որևէ սպառնալիք չէր էլ կարող ներկայացնել. Հովհաննես Մարգարյան

ԱԺ ՕԵԿ  խմբակցության պատգամավոր Հովհաննես Մարգարյանը, ով Բաղրամյան պողոտայում գտնվող սակավաթիվ ցուցարարների հետ ստեղծված իրավիճակն էր քննարկում, Yerkir.am-ի հետ զրույցում անդրադարձավ վերջին օրերի իրադարձություններին, մասնավորապես` ՀՀ ոստիկանապետ Վլադիմիր Գասպարյանի պահվածքին և սթափության կոչերին:

«Մենք էն օրն էստեղ կանգնած մենակ ենք եղել և պայքար ենք տվել, որ սադրանք տեղի չունենա, բախում տեղի չունենա: Մենք երիտասարդներին ասել ենք, որ որոշում կայացնողն իրենք են և չպետք է այն քաղաքականացվի: Մենք ասել ենք` թող իրենք որոշեն, մենք էլ պատրաստ ենք իրենց որոշումը պաշտպանել և իրենց կողքին լինել»,- ասաց պատգամավորը:

Խոսելով Վլադիմիր Գասպարյանի պահվածքի մասին` նա նշեց, որ որևէ մեկնաբանություն չի ուզում անել այդ կապակցությամբ:

«Ես նրա հետ զրուցել եմ, և նա որևէ սպառնալիք չի ներկայացրել և չէր էլ կարող ներկայացնել: Որևէ մեկը չկա ՀՀ-ում, որ փորձի ինձ և, եթե ես ժողովրդի մեջ եմ, նրանց սպառնալիք ներկայացնի: Ես էն վախեցողներից չեմ, ես իմ վախը բռնել, ցմահ ազատազրկման եմ դատապարտել: Ուղղակի ինքը մի քիչ էմոցիային էր տեղի տվել և կոչ էր անում սթափվել, այսինքն` բոլոր ճանապարհները չփակել և բախումների չգնալ»,- պարզաբանեց Մարգարյանը:

Մեր դիտարկմանը, թե Վլադիմիր Գասպարյանը երբ այսօր այցելել է Բաղրամյան, հռետորական հարց է հնչեցրել` բա կենդանի պատն ո՞ւր է, պատգամավորն արձագանքեց. «Ես չեմ լսել, որ նման բան ասի: Այստեղ չեմ եղել, չեմ լսել: Նաև նշեմ, որ պատգամավորները ոչ միայն կենդանի պատ են եղել, այլև այստեղ են եղել, որ սադրանքներ թույլ չտան»: