Իջևանի համալսարանի ռեկտորի և Տավուշի մարզպետի հարաբերությունները լարված են

Իջևանի համալսարանի ռեկտոր, ՀՀԿ-ական Սամվել Առաքելյանի և Տավուշի մարզպետ Արմեն Ղուլարյանի հարաբերությունները, «Ժողովուրդ»-ի լավատեղյակ աղբյուրների փոխանցմամբ, վերջին շրջանում լարվել են:

Մարզպետը ՀՀԿ-ականների շրջանում տեղեկություններ է տարածել, որ Սամվել Առաքելյանը Ազգային ժողովի, ՀՀ նախագահի, Իջևանի քաղաքապետի ընտրությունների ժամանակ ստացել է նախընտրական գումարները, որ բաժանի ժողովրդին, սակայն չի արել, ինչն էլ վատ ցուցանիշների պատճառ է դարձել: Ս. Առաքելյանը եղել է Իջևանի ՀՀԿ շտաբի պետը: Թերթը փորձել է տեղեկությունը ճշտել Արմեն Ղուլարյանից, սակայն նա հեռախոսազանգերին չի պատասխանել:

Իսկ ՀՀԿ-ական Ս. Առաքելյանը հավաստիացրել է, որ իրականում նման բան գոյություն չունի. «Իմ և մարզպետի հարաբերությունները շատ լավ են, մեզ մոտ որևիցե մեկ անգամ լարվածություն չի եղել: Բոլոր ընտրություններին էլ մենք շատ նորմալ աշխատել ենք ու որևիցե ընտրության էլ գումար չենք բաժանել: Բացառվում է, որ Ղուլարյանը նման բան ասի, որովհետև նման բան լինել չէր կարող»: