Գնացել էին թոշակ ստանալու, փոխարենը` խեղդվեցին ջրանցքում

Երեկ  Կոտայքի մարզի Ալափարս համայնքում հուղարկավորեցին ապրիլի 3-ին Չարենցավանի ջրանցքում խեղդված ամուսիններ Զավեն և Հռիփսիմե Սայադյաններին: Նրանց մահվան հանգամանքները դեռևս հայտնի չեն, սակայն շրջանառվող հիմնական վարկածը դժբախտ պատահարն է:

Դեպքի օրը` ժամը 14-ի սահմաններում, 79-ամյա Զավենը և նրա կինը` 73-ամյա Հռիփսիմեն,  դուրս են եկել տանից և ուղևորվել Չարենցավան քաղաք`  կենսաթոշակ ստանալու: Տանեցիների  խոսքով`  իրենք շատ նորմալ  ճանապարհել  են նրանց` պատկերացում անգամ չունենալով, թե ի՞նչ կարող է պատահել:

Սայադյանների ընտանիքն ավելի քան 80 տարի է, ինչ բնակություն է հաստատել Ալափարս գյուղում,  սակայն տարեց ամուսինները գրանցված են եղել Չարենցավան քաղաքում: Այդ էր պատճառը, որ  կենսաթոշակը ստանում էին հենց այդ քաղաքից:  Չարենցավանում են բնակվում նաև նրանց 4 որդիներից  2-ը` իրենց ընտանիքներով, իսկ մյուս երկուսը` գյուղում:  Ամուսինները բնակվել են իրենց 2-րդ որդու հետ, ով ամուսանացած է և  ունի երեխաներ: Այս մասին yerkir.am-ի հետ զրույցում պատմեց Ալափարսի գյուղապետ Վարդան Վարդանյանը`  նշելով, որ դժբախտ դեպքը, ամենայն հավանականությամբ, պատահականություն է:

Վարկածը, թե հնարավո՞ր է ամուսիններն ինքնասպանություն գործելու ինչ-որ դրդապատճառներ ունենային,  գյուղապետը հերքեց. «Նորմալ ընտանիք էր: Ճիշտ է` որդին մշտական աշխատանք չուներ,  սակայն, ինչպես գյուղի շատ ընտանիքներ, իրենք էլ զբաղվում էին գյուղատնտեսությամբ` հող էին մշակում, անասուն պահում և այդպիսով վաստակում իրենց հացը»:

Ի դեպ, այն որդին, ում հետ բնակվել են ծնողները, դատապարտված է եղել, սակայն, ինչպես նշեց գյուղապետը, լուրջ բան չկա, քանի որ տղան ծանր հանցագործություն չի կատարել և բանտում երկար ժամանակ չի անցկացրել:

Թեև ջրանցքն ընկելու պահին ամուսիներին ոչ ոք չէր տեսել, սակայն մարդիկ արդեն հասցրել էին երեւակայել, որ նրանք, ձեռք ձեռքի տված, նետվել են ջուրը:

ԱԻՆ  ջրափրկարարական հատուկ ջոկատի աշխատակիցները դիակները դուրս բերելուց հետո  բռնության հետքեր չեն հայտնաբերել, ինչը վկայում է, որ սպանության կանխանշաններ ևս չէին կարող լինել:  Ոստիկանության Չարենցավանի բաժնից yerkir.am-ըտեղեկացավ, որ փաստի առթիվ հարուցվել է քրեական գործ: Իսկ թե, ո՞րն էր տարեց ամուսինների մահվան իրական պաշտճառը, պարզ կդառնա նախաքննության ավարտից հետո: