Եգիպտոսում սալաֆիները հարձակվել են իրանական առաքելության շենքի վրա

Այսօր Կահիրեում փորձ է արվել հարձակվել Իրանի առաքելության շենքի վրա: Սալաֆիներն այդպիսով ցանկացել են իրենց բողոքը հայտնել «Եգիպտոսի շիականացման դեմ». տեղեկացնում է ИТАР-ТАСС-ը:

Նրանք քարեր են նետել շենքի ուղղությամբ, պահանջել են առաքելության ղեկավարի արտաքսումը երկրից եւ բարձրացրել են սիրիական ընդդիմության դրոշը: Ի պատասխան` շենքից սալաֆիների վրա է թափվել կրակմարիչների միջի խառնուրդը: Միջամտել է ոստիկանությունը: Իրավապահների եւ ցուցարարների միջեւ մի քանի բախումներ են եղել: Արդյունքում` ոստիկանները ամբողջ պարագծով շրջափակել են շենքը եւ կասեցրել սալաֆիների առաջխաղացումը:

Իրանի եւ Եգիպտոսի դիվանագիտական հարաբերությունները խզվել են 1980-ին, երբ Եգիպտոսը խաղաղ պայմանագիր կնքեց Իսրայելի հետ: Բացի դրանից` Եգիպտոսը ապաստան էր տվել Իրանի շահ Մոհամեդ Ռեզա Փեհլեւիին: Միայն 2010-ին երկրները սկսեցին հարաբերությունների բարելավման գործընթացը, սակայն մինչ օրս դրանք պաշտոնապես չեն վերականգնվել: Երկու երկրների մայրաքաղաքներում գործում են շահերի պաշտպանման առաքելություններ: