Պոպուլիստական հայտարարությո՞ւն, թե՞ հաղորդում հանցագործության մասին

Երեւանի ավագանու ընտրություններում ԲՀԿ համամասնական ցուցակը գլխավորող Վարդան Օսկանյանն իր ֆեյսբուքյան էջում օրերս մտահոգություն էր հայտնել Երեւանի վերաբերյալ, որին անմիջապես եւ բավականին կոշտ արձագանքեց Երեւանի քաղաքապետի տեղակալ Վահե Նիկոյանը:

«Առկա խնդիրները կուտակվել են անկախության ողջ ժամանակահատվածում, ներառյալ` Վարդան Օսկանյանի` կառավարության անդամ լինելու 10 երկարուձիգ տարիներին, երբ նա ցանկության դեպքում հնարավորություն ուներ բարձրացնել իրեն հուզող հարցերը երկրի բարձրագույն ղեկավարության առջեւ»:

Թե ինչո՞ւ պետք է արտգործնախարարը բարձրացներ Երեւանի կառուցապատման կամ կանաչ տարածքների բետոնապատման հարցերը, նույնիսկ` կառավարության անդամ լինելու պարագայում, այնքան էլ հասկանալի չէ, բայց կարեւորը Վահե Նիկոյանի «պատասխանի» շարունակությունն է. «Ինչ վերաբերում է որպես կանաչ գոտու բետոնապատման օրինակ ներկայացված «Օպերային կից տարածքում» կատարվող բարեկարգման աշխատանքներին, ապա հենց բերված կոնկրետ օրինակից ակնհայտ է դառնում, որ այն՝ իրողությունների աղավաղման ճանապարհով, հետապնդում է պոպուլիստական նպատակ: Նշված տարածքում որեւէ սանտիմետր կանաչ տարածք չի բետոնապատվում, այլ, քաղաքապետարանի հսկողությամբ, պարոն Օսկանյանի պաշտոնավարման տարիներին գործելու թույլատրություն ստացած սրճարանն իրականացնում է տարածքի մաշված եզրաքարերի եւ սալաքարերի փոխարինման ու վերանորոգման աշխատանքներ: Դրա փոխարեն հենց այդ նույն սրճարանի հարեւանությամբ Վարդան Օսկանյանի` կառավարության անդամ լինելու տարիներին թույլատրվեցին ու վեր խոյացան կապիտալ կառույցներ, ինչն, իհարկե, անթույլատրելի էր»:

Ու այստեղ, ինչպես ասում են, «թագավորի տղեն մատը կծեց…», որովհետեւ «անթույլատրելի էր» ձեւակերպումը մայրաքաղաքի կառավարման հարցերում, այն էլ` փոխքաղաքապետի բերանից հնչելով, նշանակում է կա’մ ինքնախոստովանություն, եթե այդ «անթույլատրելի» արարքը կամ գործունեւությունը տեղի է ունեցել այն ադմինիստրացիայի կառավարման օրոք, որի ներկայացուցիչն է նման արտահայտություն անողը, կա’մ «անթույլատրելի» կառուցապատումներ անելու մեղադրանք է նախկին քաղաքապետերի հասցեին:

Բայց ո՞ր քաղաքապետին կամ քաղաքային ադմինիստրացիային նկատի ուներ պարոն Նիկոյանը: Վարդան Օսկանյանը կառավարության կազմում` արտգործնախարարի պաշտոնում, աշխատել է 1998-2008 թվականներին: Այդ ժամանակահատվածում Երեւանն ունեցել է 4 քաղաքապետ` Սուրեն Աբրահամյան, Ալբերտ Բազեյան, Ռոբերտ Նազարյան եւ Երվանդ Զախարյան:

Սուրեն Աբրահամյանն ու Ալբերտ Բազեյանը եղել են «Միասնություն» դաշինքի անդամներ, իսկ այդ դաշինքին մաս էին կազմում ՀՀԿ-ն ու ՀԺԿ-ն, ու թեեւ այսօր այլ քաղաքական ուժի են պատկանում, բայց քաղաքապետ եղած ժամանակ ՀՀԿ-ականների հետ նույն դրոշի ներքո էին «պայքարում»: Ռոբերտ Նազարյանը մինչ օրս շարունակում է պաշտոնավարել պետական համարվող կառույցում, այսինքն` իշխանության ներկայացուցիչ է, այսինքն` իրենցից է: Ինչ վերաբերում է Երվանդ Զախարյանին, ով նույնպես շարունակում է պատասխանատու պետական պաշտոն զբաղեցել մինչ օրս, ՀՀԿ-ական է 2006 թվականից:

Ստացվում է, որ մեր հարգարժան փոխքաղաքապետը, մեղմ ասած, «բոչկա է գլորում» նախկին ու ներկա` առնվազն չորս թիմակիցների վրա… Փոխքաղաքապետի պատասխանից մեզ մոտ բնական հարց է առաջանում` իսկ ո՞վ էր խանգարում Երեւան քաղաքի այսօրվա ղեկավարությանը, այդ թվում` նույն փոխքաղաքապետին, շտկել «Օսկանյանի կառավարության» թույլ տված սխալները եւ քանդել «անթույլատրելի» կառույցները:

Մեկ կոնկրետ օրինակ եւս` իսկ ո՞ր կառավարության օրոք է Խանջյան-Վարդանանց փողոցների խաչմերուկին կից կառուցվել մի քանի հարկանի ինչ-որ ժամանցի վայր, որի շինարարական աշխատանքների ժամանակ տեղի ունեցած փլուզումից հետո անգամ շենքը չքանդեցին: Եվ նույնիսկ այն պայմաններում, երբ պարզվեց, որ շենքի կառուցման թույլտվություն չկա: Փլուզման պահին Օսկանյանը կառավարության` այլեւս նախկին անդամ էր, իսկ Վահե Նիկոյանը՝ գործող փոխքաղաքապետ:

Դրանից բացի, երբ խոսքը վերաբերում է ինչ-որ շինության ու դրա մասին ասում են «անթույլատրելի», ապա նշանակում է, որ այդ շինության կառուցումը եղել է ապօրինի, քանի որ դա թույլատրվում է համապատասխան փաստաթղթերով, որոնք տրվում են օրենքին համապատասխան: Ու եթե չկա շինթույլտվություն, կամ այն տրված է, բայց հակասում է օրենքին, ապա շինություն կառուցելը ապօրինի է: Ուստի փոխքաղաքապետի հայտարարությունը` «անթույլատրելի» շինության մասին, ընկալում ենք որպես հաղորդում հանցագործության մասին:

Եվ հարց է առաջանում` այս հայտարարությունն ընդունվե՞լ է որպես հաղորդում հանցագործության մասին:

«Այդ հարցով պետք է քաղաքապետարանում զբաղվեն, եւ եթե դա քրեորեն պատժելի արարք լինի, ապա կարող են հայտնել, ու դա կընդունվի որպես հանցագործության մասին հաղորդում` ոստիկանության կամ դատախազության կողմից»,- մեր հարցին ի պատասխան՝ ասաց ոստիկանության հասարակայնության հետ կապի եւ լրատվության վարչության պետ Աշոտ Ահարոնյանը:

Այնպես որ` այդպես էլ պարզ չէր` փոխքաղաքապետն ի՞նքն էր պոպուլիստական բնույթի հայտարարություն անում, թե՞, իրոք, հանցագործության մասին հաղորդում էր հրապարակում: Համապատասխան մարմինների ականջը կանչի…

Գեւորգ ԱՎՉՅԱՆ