Կիպրոսի խորհրդարանը ''փրկության'' ծրագիր է ընդունել

Կիպրոսի խորհրդարանը այս գիշեր օրենքներ է ընդունել երկրի բանկային համակարգի առողջացման համար` հուսալով, որ կհամոզի ԵՄ եւ ԱՄՀ վարկատուներին, որ այս շաբաթվա ընթացքում արդեն երկրորդ հակաճգնաժամային ծրագիրը կենսունակ է. տեղեկացնում է Росбалт-ը:

Կիպրոսի նախագահ Նիկոս Անաստադիասը եւ քաղաքական կուսակցությունների առաջնորդները մտադիր են հանգստյան օրերին մեկնել Բրյուսել, որպեսզի ԵՄ ղեկավարությանը ներկայացնեն կղզու «փրկության ծրագիրը»:

Ավելի վաղ վարկատուները համաձայնել էին Կիպրոսին ընդամենը 10 մլրդ եվրո տրամադրել, մինչդեռ ֆինանսական խնդիրների լուծման համար անհրաժեշտ է 16 մլրդ եվրո: Մնացած 6 մլրդը դրվել էր Կիպրոսի կառավարության ուսերին, որը նախ ծրագրում էր հարկել բանկերում եղած դեպոզիտները, սակայն դա  խուճապ առաջացրեց բանկերում ներդրումներ ունեցողների շրջանում: Խորհրդարանը մերժեց այդ օրինագիծը, սակայն պահպանվում է բանկերի փակման սպառնալիքը:

Հիշեցնենք, որ Կիպրոսի պատվիրակության բանակցությունները Մոսկվայում եւս հաջողությամբ չեն պսակվել: Ռուսաստանին չեն հետաքրքրել Կիպրոսի առաջարկները`  Միջերկրական ծովի գազի եւ նավթի առափնյա պաշարները: