Շնորհակալությունը հացին չես քսի

Կրեմլում փորձում են պաշտոնյաներին արգելել օգտագործել «կոռուպցիային վերաբերող բառապաշար», ինչպիսիք են հետևյալ արտահայտությունները` «Շնորհակալությունը հացին չես քսի», «Այդ հարցը բարդ է, բայց հնարավոր է լուծել», «Կպայմանավորվենք» և այլն:

Այս մասին գրում է անգլիական The Guardian-ը, որն էլ նման տեղեկություններ է փորձել գտնել ՌԴ աշխատանքի և սոցապահովության նախարարության փաստաթղթերը ուսումնասիրելիս:

«Ո'չ ձերբակալությունների, ո'չ քարոզչության, ո'չ էլ տուգանքների միջոցով չկարողացան վերացնել կոռուպցիան Ռուսաստանում: Այժմ Կրեմլը միջոց է փնտրում պաշտոնյաներին արգելել գոնե օգտագործել կաշառակերության մասին բառեր և արտահայտություններ, որպեսզի վերացնի այդ աղտը»,- գրել է The Guardian-ը:

Բրիտանական թերթի աղբյուրի համաձայն` պաշտոնյաներին խորհուրդ է տրվում խուսափել նաև ցածր աշխատավարձերի, չաշխատող բարեկամների, թանկարժեք գույք ձեռք բերելու ցանկությունների և այլնի մասին խոսել:

Աղբյուրը գրում է, որ թե' ցարական Ռուսաստանում, թե' ԽՍՀՄ-ում կոռուպցիան եղել է, սակայն Պուտինի օրոք այն հասել է հսկայական չափերի: