Քրեական տարրերը Շիրակի նորանշանակ մարզպետի համար դժվարություն չեն ստեղծի

ԱԱԾ տնօրենի տեղակալ Ֆելիքս Ցոլակյանը դեռ մի քանի օր առաջ գիտեր, որ նշանակվելու է Շիրակի մարզպետ: Այս մասին լրագրողների հետ զրույցում Ցոլակյանը հայտնեց կառավարության նիստի ավարտից հետո, երբ արդեն իր թեկնածությունը հաստատվել էր:

Դիտարկմանը, որ Շիրակի մարզում քրեական հատվածը մեծ է, դժվարություններ չի՞ ունենա, մարզպետը պատասխանեց. «Մարզպետի եւ մարզպետարանի աշխատանքն ավելի շատ ժողովրդի սոցիալ-տնտեսական հարցերի լուծման հետ է կապված եւ մարզի գոյություն ունեցող կառույցների աշխատանքի համակարգն է: Կրիմինալ ասվածը բոլոր տեղերում էլ կա: Չկա նման բնագավառ, որտեղ չլինի: Կրիմինալի հետ աշխատում են համապատասխան մարմինները, ոչ թե մարզպետարանը: Մարզպետարանը կրիմինալի հետ ի՞նչ պետք է անի»:

Նորանշանակ մարզպետը չի կարծում, որ քրեական տարրերն ավելորդ դժվարություններ կստեղծեն իր աշխատանքում: Բայց, մյուս կողմից, ընդունում է, որ Շիրակի մարզում դժվարություններ շատ կան եւ կլինեն:

Հարցին, թե ուրախությա՞մբ է գնում մարզպետի պաշտոնին, Ցոլակյանը պատասխանեց. «Նորմալ»:

Ըստ նրա` իրեն` որպես ուժային կառույցի ներկայացուցչի, մարզի բնակիչները նորմալ կընդունեն: Իսկ թե ինչպե՞ս է ստացվում, որ Շիրակի մարզպետ նշանակվում են հիմնականում ուժային կառույցների ներկայացուցիչներ, Ցոլակյանը նշեց, որ միայն վերջին երկու նշանակումների դեպքում է այդպես, մինչ այդ Շիրակի մարզպետերը ուժային կառույցների ներկայացուցիչներ չեն եղել:

Խոսելով կադրային փոփոխություններից` նորանշանակ մարզպետը նշեց, որ ամեն ինչ կորոշվի աշխատանքի ընթացքում, ով աշխատող է` կաշխատի:

Հարցին` ինչո՞ւ իր թեկնածության վրա կանգ առան, պատասխանել չկարողացավ, միայն նշեց, որ միանգամից է համաձայնել առաջարկությանը. բոլոր աշխատանքներն էլ Ցոլակյանի համար կարեւոր են, բայց գերադասեց մարզպետի պաշտոնը, քանի որ «ժողովրդի հետ աշխատելու մեծ ցանկություն ունի»:

«Խոստումների ժամկետներ չեմ կարող ասել, բայց ձգտելու եմ լինել արդար, մարդկանց հետ շփումներում լինել ազնիվ եւ բոլոր հարցերը լուծել` խորհրդակցելով»,- հայտարարեց Շիրակի նորանշանակ մարզպետը:

Նշենք, որ Ֆելիքս Ցոլակյանը ծնունդով Շիրակից է` Անիի տարածաշրջանի Ջրարբիկ գյուղից: Նա հայտարարեց նաեւ, որ տեղափոխվելու է Շիրակ: