Թշնամին օգտվում է Հայաստանի ներքաղաքական անկայունությունի՞ց

Երեկ երեկոյան` 18։00-ից մինչեւ կեսգիշեր, հակառակորդի կողմից տարբեր զինատեսակներից անընդմեջ գնդակոծվել են Տավուշի մարզի սահմանամերձ Այգեպար եւ Մովսես գյուղերը։

Yerkir.am-ի թղթակցի հետ զրույցում ՊՆ մամլո խոսնակ Արծրուն Հովհաննիսյանը հաստատեց, որ շփման գծում նախօրեին որոշակի լարվածություն նկատվել է:

«Պարզ է, որ գյուղացիները վախեցած են, կրակոցներն այնտեղ պարբերաբար լինում են: Հակառակորդի կողմից հրադադարի ռեժիմի խախտման դեպքերը վերջին օրերին ավելացել են»,- ասաց նա և ցավով փաստեց, որ վերջին մեկ ամսվա ընթացքում բանակում արդեն 3 զոհ ունենք, ինչը սահմանային գծում լարվածության ցուցանիշ է:

Հարցին` հատկապես վերջին օրերին ադրբեջանցիների կողմից նկատվող ագրեսիան հնարավո՞ր է կապված լինի ներքաղաքական անկայուն իրավիճակի հետ, ՊՆ մամլո խոսնակը պատասխանեց. «Հնարավոր է, ոչինչ չի կարելի բացառել: Թե' ներքաղաքական, թե' իրենց հերթական կամայականության, թե' Արցախյան շարժման 25-ամյակի հետևանք կարող է լինել»: