Օգտվում են մենաշնորհից

Այսօր «Երկիր»-ի խմբագրություն էր զանգահարել բեյրութահայ մեր հայրանակիցներից մեկը եւ դժգոհել ազգային ավիափոխադրող «Արմավիա»-ի գնային քաղաքականությունից:

Մեր զրուցակիցը հայտնեց, որ ոչ մի տարի նման գներ չեն եղել. ինքը կարողացել է ամեն տարի գալ հայրենիք եւ իր հանգիստը անցկացնել Հայաստանում:

Իսկ մեր կառավարության ղեկավարը, ինչպես նաեւ էկոնոմիկայի նախարարն առիթը բաց չեն թողնում գովերգելու տարեցտարի զարգացում ապրող զբոսաշրջության ոլորտը եւ զբոսաշրջիկների ավելացող թիվը: Հարց է առաջանում` այդ ի՞նչ հաշվարկներ են անում մեր պաշտոնյաները, երբ ամենամեծ հայկական համայնքից` Բեյրութից մայր հայրենիք հասնելու եւ վերադառնալու համար (1,5 ժամ թռիչք) մեր հայրենակիցները միայն ավիատոմսի վրա ծախսում են մինչեւ 750-800 ԱՄՆ դոլար:

«Երկիր»-ը փորձեց «Արմավիա»-ի Երեւանի գլխավոր գրասենյակից ճշտել Երեւան-Բեյրութ-Երեւան ավիատոմսի գները: Պարզվեց, որ ամենաէժան ավիատոմսը Երեւանում ավիաընկերությունն առաջարկում է 210 հազար 900 դրամով (575 ԱՄՆ դոլար), իսկ ամենաթանկը մոտ 750 ԱՄՆ դոլար է: Նշենք, որ Բեյրութում նույն տոմսն ավելի թանկ է: