Այլիսլիին համարում եմ իմ գրչակից եղբայրը. Լեւոն Ջավախյան

Մենք` հայերս, ինչ էլ անենք` ի նպաստ ադրբեջանցի գրող Աքրամ Այլիսլիի, նրա վիճակն ավելի կվատանա. լրագրողների հետ հանդիպման ժամանակ հայտարարեց գրող Լևոն Ջավախյանը:

Հիշեցնենք, որ Աքրամ Այլիսլին իր «Քարե երազներ» գրքում անդրադարձ է կատարվում Սումգայիթի եւ Բաքվի կոտորածներին, ինչի պատճառով էլ հալածանքների է ենթարկվում իշխանության կողմից:

Ըստ Ջավախյանի` եթե մենք փորձենք ինչ-որ կերպ օգնել գրողին, նրա հանդեպ իշխանության կողմից իրականացվող ճնշումները նոր թափ կառնեն, եւ այդ իսկ պատճառով էլ դիմել են թուրք մտավորականներին` կոչով, որպեսզի նրանք պաշտպանեն Այլիսլիին:

Ջավախյանը համարում է, որ Այլիսլին իր գրքով սատարել է հայ ժողովրդին` արտահայտելով ընդհանուր մարդասիրական գաղափարներ, որոնք ժամանակին արծարծվել են Աբովյանի «Թուրքի աղջիկը», Թումանյանի «Ահմադը» պատմվածքներում կամ Վ. Պետրոսյանի «Կրակե շապիկը» վեպում:

«Այլիսլիին համարում եմ իմ գրչակից եղբայրը»,- ասաց Ջավախյանը` հավելելով, որ ինքը փետրվարի 13-ին նամակով դիմել է գրողին` շեշտելով, որ հայ մտավորականներից շատերը կիսում են գրողի գաղափարները:

Իսկ ազատամարտիկ Սարգիս Հացպանյանը տեղեկացրեց, որ Թուրքիայի գրողների արհմիության անունից թուրք կին գրող Սունա Արասը հայտարարություն է արել` կոչ անելով համատեղ տպագրության պատրաստել Այլիսլիի և Ջավախյանի գրքերը: Ըստ Հացպանյանի` սա վկայում է, որ նման մարդիկ, անկախ ամեն ինչից, կողմնակից են երկու ժողովուրդների բարեկամությանը:

Նարինե ՀԱՐՈՒԹՅՈՒՆՅԱՆ