Աղդամի ճանապարհով թեկուզ 100 գր․ ալյուր Արցախ մտնելու հենց հաջորդ րոպեին սկսվելու է ՀՀ-ն թուրքացնելու մեկնարկը․ Արտյոմ Տոնոյան

ԵՊՀ իրանագիտության ամբիոնի դասախոս Արտյոմ Տոնոյանը գրում է.

«Համակարգային մտածողություն ունեցող մարդու հետ կարող է մրցակցել ու պարտադրած խաղի կանոնները փորձել փոխել մենակ նույն որակը ունեցող մեկը։ Այսօրվա իրավիճակում արդեն՝ հենց մենակ փորձել, քանի որ փոխելու փորձ անողը լինելու է անհամեմատ անհավասար պայմաններում։

Մեր թշնամի երկրի նախագահը ունի համակարգային մտածողություն։ Սա պետք է արձանագրել ու դրա հետ նստել հաշվի։

Պատերազմում կողմերից մեկը հաղթել է առաջնորդի համակարգային մտածողության շնորհիվ և մյուսը պարտվել է իր առաջնորդի մոտ դրա բացակայության պատճառով։

Չես կարող ունենալ մրցունակ և ուժեղ համակարգ, եթե չունես նման մտածողությամբ ղեկավար։

Շարունակելով նախորդ գրառումս և ի պատասխան թեզի, որ լուծումը ի վերջո Աղդամի ճանապարհից օգտվելն է ու իրավիճակի հետ համակերպվելը, սկսեմ այս գրառումը մի մեջբերմամբ.

«Վերադարձող մարդկանց անվտանգությունն ապահովելու համար վերադարձի թիրախային տարածքներում պետք է տեղակայվի համապատասխան մանդատով օժտված միջազգային խաղաղապահ առաքելություն։ Այդ առաքելությունը պետք է բաղկացած լինի Համայնքի կողմից վստահված երկրների ուժերից» (Արևմտյան Ադրբեջան վերադարձի հայեցակարգ, 26 հունվարի, 2023)։

Սա մի հատված է Ադրբեջանում ընդունված Հայաստանը ադրբեջանցիներով բնակեցնելու հայեցակարգից, որտեղ սևով սպիտակի վրա գրված է, որ Հայաստանի տարածքում ադրբեջանցիների բնակեցմանը զուգահեռ պետք է ՀՀ–ում տեղակայվեն Թուրքիայի զինված ուժերի ստորաբաժանումներ (համայնքի կողմից վստահելի մի երկիր կա՝ Թուրքիա)։

Ինչո՞ւ սկսեցի հենց այս մեջբերմամբ։ Որովհետև եթե Արցախի հայությունը ճարահատյալ և ՀՀ իշխանությունների հանցավոր պնդումների ու դրան զուգակցվող անգործության պայմաններում ընդունում է այդ առաջարկը, դա դեռ չի նշանակում, որ Ադրբեջանում շամպայն են բացելու ու իրար շնորհավորեն։

Իրավիճակը մենակ մեզ կարող է էդքան պրիմիտիվ թվալ։ Դա նշանակում է ունենալ 120.000 համայնք Ադրբեջանի ներսում, որի մաս է ճանաչվել Արցախը ՀՀ գործող իշխանությունների կողմից, ունենալ ՌԴ զորքեր սեփական տարածքում և չունենալ ոչ մի ադրբեջանցի ՀՀ տարածքում։

Ամփոփելով՝

Աղդամի ճանապարհով թեկուզ 100 գրամ ալյուր Արցախ մտնելու հենց հաջորդ րոպեին սկսվելու է ՀՀ–ն թուրքացնելու, այսինքն ադրբեջանցիներով բնակեցնելու և դրանց անվտանգությունը իբր երաշխավորելու թեզի տակ ՀՀ–ում Թուրքիայի զինված ուժեր տեղակայելու գործընթացի մեկնարկը։

Երբ ասում ենք՝ դիմացը նստած է համակարգային մտածողություն ունեցող մեկը, իսկ հակառակ կողմում դրա տոտալ բացակայություն է, այ սրա մասին ենք ասում»։