Ռուսաստանը Ադրբեջանի տարածքով ալյուր կմատակարարի Իրան

Ռուսաստանի Սարատովի մարզում գտնվող Էնգելսի ալրաղացն իր արտադրանքի մի մասը կարտահանի երկաթուղով. գրում է «АиФ-Саратов»-ը։

Տեղեկությունների համաձայն՝ գործարանը մարտին համագործակցության պայմանագիր է կնքել Պրիվոլժսկայայի երկաթուղիների տնօրինության հետ՝ տերմինալի և պահեստային համալիրի կառավարման համար։ Նախատեսվում է, որ առաջին փոխբեռնման աշխատանքները կսկսվեն ապրիլին։

Սարատովի ալյուրը Վոլգայի երկաթուղու Անիսովկա կայարանից կառաքվի Ադրբեջան (Աստարա կայարան), այնուհետև կհասցվի Իրան։ Խմբաքանակների ամսական ծավալը կկազմի 2 հազար տոննա (36 ծածկված վագոն)։

Հիշեցնենք, որ իրանցի գործարար շրջանակները դժգոհել են, որ Հայաստանի տարածքով բեռների տարանցումը բարդացել է. պատճառը ՀՀ ներկայիս իշխանությունների կողմից Գորիս-Կապան ճանապարհի մի հատվածի ադրբեջանական վերահսկողությանը հանձնելն է, իսկ այլընտրանքային Տաթև-Աղվանի ճանապարհը հարմար չէ բեռնատարների համար: