Կրթությունը տոմս է դեպի ապագա

Այսօր տեղի է ունեցել Հայաստանում Եվրոպական Միության կենտրոնի բացումը, որին մասնակցել են ՀՀ ԿԳ նախարար Արմեն Աշոտյանը, ՀՀ-ում դիվանագիտական ներկայացուցչությունների անդամներ և Հայաստանի կրթական հաստատությունների ներկայացուցիչներ:

Աշոտյանը նշել է, որ, չթերագնահատելով այլ ոլորտների կարևորությունը, այնուհանդերձ, ցանկանում է հավաստել, որ միայն կրթության ոլորտում է հնարավոր դնել եվրոպական ինտեգրման երկարաժամկետ, ինստիտուցիոնալ հիմքեր, եւ միայն կրթությունն է, որ թույլ է տալիս դաստիարակել, կերտել սերունդներ, ովքեր գիտելիքից բացի, ունեն միևնույն արժեքները:

«Իսկ Եվրոպան, ինչպես գիտենք խարսխված է ոչ միայն քաղաքական հետաքրքրություների, այլ նախևառաջ արժեքների վրա: Նորաբաց կենտրոնն իր գործունեությամբ աջակցելով ՀՀ կրթական համակարգին` միաժամանակ աջակցում է հենց եվրոպական կրթական տարածքին»,- ասել է նախարարը:

Հայաստանում ԵՄ պատվիրակության ղեկավար, դեսպան Տրայան Հրիսթեան իր հերթին նշել է, որ կրթությունը տոմս է դեպի ապագա, և այն մարդիկ, ովքեր ստանում են այդ կրթությունը և նախապատրաստվում են վաղվա օրվան, կարող են ապագա կառուցել և հաջողակ լինել.«Նորաբաց կենտրոնը կհամագործակցի բարձրագույն կրթական հաստատությունների և ավագ դպրոցների աշակերտների հետ` մեծացնելու նրանց իրազեկությունը Եվրոպական Միության և ՀՀ-ում ԵՄ-ի գործունեության վերաբերյալ»: