Վրացական խորհրդարանը չի ցանկանում լսել երկրի նախագահին

Վրաստանի նախագահ Միխեիլ Սահակաշվիլին չի կարող հանդես գալ խորհրդարանում ամենամյա ուղերձով. հայտարարել է Վրաստանի խորհրդարանի նախագահ Դավիթ Ուսուպաշվիլին` նշելով, որ որոշումն ընդունվել է խորհրդարանական մեծամասնության կողմից: Նա այդ որոշումը պայմանավորում է այն բանով, որ փոքրամասնությունը, Սահակաշվիլիի աջակցությամբ, խոչընդոտում է սահմանադրական փոփոխությունների ընդունմանը, որոնք նվազեցնելու են նախագահի լիազորությունները. տեղեկացնում է apsny.ge-ն:

«Մենք ցանկանում ենք, որ նախագահը գա խորհրդարան, որն ունի անկախ մարմնի բոլոր լիազորությունները, այլ ոչ թե մարմնի, որը նախագահը կարող է ցանկացած պահի լուծարել: Սպասում ենք փոքրամասնության եւ նրա առաջնորդի որոշմանը` սահմանադրական փոփոխությունների վերաբերյալ»,- ասել է Ուսուպաշվիլին:

Հիշեցնենք, որ Սահակաշվիլիի ելույթը խորհրդարանում նախատեսված է վաղը` փետրվարի 8-ին: