Փետրվարի 18-ից հետո եռյակը տուն կգնա

ՀՀ նախագահի թեկնածու Արամ Հարությունյանը զարմացած է Րաֆֆի Հովհաննիսյանի, Հրանտ Բագրատյանի եւ Պարույր Հայրիկյանի վերջին համատեղ հայտարարությունից, քանի որ այդ մասին արդեն տեւական ժամանակ է` խոսում է նախագահի մեկ այլ թեկնածու` Արման Մելիքյանը: Հարությունյանն այսօր լրագրողների հետ հանդիպման ժամանակ հայտարարեց, որ էթիկան պահանջում էր, որ հայտարարության մեջ գոնե լիներ Արման Մելիքյանի անունն ու ստորագրությունը:

«Նախաձեռնության հեղինակը Արման Մելիքյանն է, եւ նրանք չեմ դիմել Արմանին, անգամ այս դեպքում չեն ցանկանում, ինչպես Խաչիկ Ասրյանն է ասում, որ իրենց եռամիասնությունը խախտվի»,- հայտարարեց Արամ Հարությունյանը եւ վստահեցրեց, որ անգամ իդեալական ցուցակների դեպքում այս ընտրություններն անօրինական են:

Նա վստահ է, որ նախագահի որոշ թեկնածուներ դեկորատիվ դեր են կատարում, եւ եթե միանան իրար` դեկորացիայի վրա դեկորացիա կավելանա: Լրագրողների հարցին` եթե նախագահի երեք թեկնածուներից կողմից նախաձեռնությանը միանալու առաջարկություն արվեր, կհամաձայնեի՞ք, Հարությունյանը հայտարարեց` ոչ:

Նա վստահեցրեց նաեւ, որ այդ երեք թեկնածուները փետրվարի 18ից հետո շատ տխուր վիճակում են հայտնվելու, տուն են գնալու եւ պետք է բացատրություն տան:

Ի դեպ, Արամ Հարությունյանը Բագրատյանին, Հայրիկյանին եւ Հովհաննիսյանին բանավեճի հրավիրեց: