Նախարարն ուզում է, որ արվեստագետը կենցաղային հոգսից ձերբազատված լինի

Այս տարի քայլեր են արվելու դպրոցներում 4-9-րդ դասարանի աշակերտներին ազգային երգ ու պար դասավանդելու, իսկ ավագ դպրոցներում համաշխարհային մշակույթ ուսուցանելու համար. yerkir.am-ի հետ զրույցում նշեց ՀՀ մշակույթի նախարար Հասմիկ Պողոսյանը: Ըստ նրա` դասընթացները կիրականացվեն 2012-ին ընդունված` մշակութային կրթության եւ գեղագիտական դաստիարակության ազգային ծրագրի շրջանակներում:

«Այս տարի քայլեր պետք է անենք «Գրադարանի մասին» օրենքը հստակ կիրառման մեջ դնելու համար: Սա կարեւոր է այնքանով, որ հնարավորություն կտա գրադարաններին, որոնք ունեն համապատասխան ֆոնդեր եւ կարողություններ, միավորվել մի ցանցի մեջ եւ ստանալ պետական աջակցություն»,- ասաց նախարարը:

Պողոսյանը նշեց, թե կուզեր, որ այս տարի մշակութային գործիչներն «ավելի հանգիստ» պայմաններում ստեղծագործեին, այսինքն` սոցիալապես ավելի ապահովված լինեին, թեեւ, ըստ նախարարի, պարզ չէ` դա կօգնի՞ նրանց` ավելի լավ ստեղծագործել, թե՞ հակառակը. «Կուզեի, որ արվեստագետները կենցաղային հոգսերից ձերբազատված լինեին եւ կենտրոնանային միայն իրենց ստեղծագործական աշխատանքի վրա»: