Նոր մանրամասներ գաղտնալսված ձայնագրության վերաբերյալ

Նախկին արտգործնախարար, ԲՀԿ խմբակցության պատգամավոր Վարդան Օսկանյանի և ՀԱԿ խմբակցության ղեկավար Լևոն Զուրաբյանի գաղտնի ձայնագրության առթիվ հարուցված քրեական գործի վերաբերյալ հնարավոր է` շուտով նոր մանրամասներ հայտնի լինեն: Այս մասին galatv.am-ի հետ զրույցում ասել է Հատուկ քննչական ծառայության հատկապես կարևոր գործերով քննիչ Մուշեղ Բաբայանը:

«Նախաքննությունը հիմա ընթացքի մեջ է: Այս պահին, նաև հաշվի առնելով, որ չբացահայտված հանցագործություն է, նախաքննության գաղտնիությունից ելնելով, հրապարակման ենթակա որևէ նոր բան չկա: Ինչ որ կար հրապարակելու, մամուլով արդեն հրապարակել ենք: Միգուցե մի 15-20 օր հետո նախաքննության որոշ տվյալներ նախաքննության մարմինը նպատակահարմար գտնի հրապարակելու համար»,- նշել է նա:

Հարցաքննության դարձյալ կանչվելո՞ւ են, արդյոք, պատգամավորները, քննիչը չի կարող ասել:  «Այս պահին չեմ կարող ասել, նրանք արդեն հարցաքննվել են մեկ անգամ: Եթե կլինեն լրացուցիչ հարցեր, իհարկե, կկանչենք հարցաքննության»,- տեղեկացրել է Մուշեղ Բաբայանը: