Նանսենի անունը կապված է մեր անվան հետ

Օպերայի եւ բալետի ազգային ակադեմիական թատրոնի դահլիճում երեկ բևեռախույզ, մարդասեր և հասարակական-քաղաքական գործիչ Ֆրիտյոֆ Նանսենի 150-ամյակին նվիրված երեկո էր: Երկու մասից կազմված համերգի սկզբում մասնակիցներն ու հյուրերը մեկ րոպե լռությամբ հարգեցին Ֆ. Նանսենի հիշատակը, ինչից հետո հնչեցին Հայաստանի և Նորվեգիայի օրհներգերը:

Երեկոյին մասնակցում էին սիմֆոնիկ նվագախումբը, որը ղեկավարում էր նորվեգացի դիրիժոր Թերջե Միկելսոնը, ինչպես նաև մենակատարներ` նորվեգացի շեփորահար Թորմոդ Ասգարդը և դաշնակահար Արմեն Բաբախանյանը` Հայաստանից:

Համերգի առաջին մասում հնչեց Արամ Խաչատրյանի «Սպարտակ» բալետից «Ռեքվիեմ» կոչվող հատվածը, Էդվարդ Գրիգի «Կոնցերտ դաշնամուրի և նվագախմբի համար», իսկ երկրորդ հատվածում` Ալեքսանդր Հարությունյանի «Կոնցերտ շեփորի և նվագախմբի համար» և Յոհան Հալվորսենիվի «Նորվեգական ռապսոդիան»:

Հովհաննես Թումանյանի թանգարանի տնօրեն Նարինե Թուխիկյանի խոսքերով` Հայաստանը չէր կարող անմասն մնալ այս հիշարժան իրադարձությունից, քանի որ հարյուրհազարավոր հայերի ճակատագրեր կապված է եղել Նանսենի ծավալած գործունեության հետ:

«Նա այն բացառիկ մարդկանցից է, ում կարող են բարության և մարդասիրության տիպար անվանել»,- ասաց Թուխիկյանը` հավելելով, որ Նանսենի անունը հավերժ կապված է մեր ժողովրդի ճակատագրի և անվան հետ: