Կրակոցներ Թումանյան փողոցում. կա 2 վիրավոր

Քիչ առաջ ավազակային հարձակում է տեղի ունեցել Երեւանում: Դեպքի վայրից «Երկիր»-ին ֆոտոլրագրող Գագիկ Շամշյանը հայտնեց, որ, ըստ նախնական տեղեկությունների, Թումանյան 2 հասցեում գտնվող տարադրամի փոխանակման կետից փորձել են գումար հափշտակել:

Դեպքի վայրում են մեծ թվով ոստիկանության աշխատակիցներ` ոստիկանության Երեւան քաղաքի վարչության պետ Ներսես Նազարյանի գլխավորությամբ: Այնտեղ է նաեւ ոստիկանության Կենտրոնականի բաժնի օպերատիվ խումբը` բաժնի պետ Սարգիս Մարտիրոսյանի գլխավորությամբ:

Գագիկ Շամշյանը հայտնեց, որ տարադրամի փոխանակման կետից երկու հոգու շտապօգնության ավտոմեքենան տեղափոխել է Հանրապետական հիվանդանոց:

Ականատեսները պատմել են, որ հնչել է 4-5 կրակոց: Ոստիկաններն արդեն հայտնաբերել են «Մակարով» տեսակի ատրճանակի կրակված փամփուշտներ:

Պարզվել է վիրավորների ինքնությունը. հրազենային վնասվածքներ են ստացել փոխանակման կետի երկու աշխատակիցները`  40-ամյա Ռադիկ Վիրոյանը եւ 52-ամյա Լեւոն Ավետիսյանը: Վիրավորների կյանքին վտանգ չի սպառնում: