Կադրային փոխատեղումներ՝ Արցախում

Արցախում կադրային փոխատեղումները շարունակվում են. պաշտոններից ազատվածները նոր պաշտոնների են նշանակվում:

Այսօր վարչապետ Արա Հարությունյանի որոշմամբ՝ Լեւոն Գրիգորյանը, այլ աշխատանքի անցնելու կապակցությամբ, ազատվել է ԼՂՀ արտադրական ենթակառուցվածքների նախարարի տեղակալի պաշտոնից: Նախագահի այսօրվա հրամանագրով նա 5 տարի պաշտոնավարման ժամկետով նշանակվել է ԼՂՀ կառավարությանն առընթեր անշարժ գույքի կադաստրի պետական կոմիտեի նախագահ:

Վարչապետի մյուս երկու որոշումներով՝ Իգոր Բաղրյանն ազատվել է ԼՂՀ կառավարության աշխատակազմի վերահսկողական ծառայության պետի պաշտոնից եւ նշանակվել ԼՂՀ արտադրական ենթակառուցվածքների նախարարի տեղակալ, իսկ կառավարության աշխատակազմի վերահսկողական ծառայության պետ է նշանակվել Արմո Ծատրյանը:

Եվ այսպես, վերջերս արված կադրային փոփոխությունների արդյունքում դեռ թափուր պաշտոններ կան. չեն նշանակվել  կառավարության աշխատակազմի ղեկավար-նախարարը եւ արտաքին գործերի նախարարը (պաշտոնակատարներ են նշանակվել) եւ Մարտունու շրջանի վարչակազմի ղեկավարը, որը, մեր տեղեկություններով, դարձյալ պետք է ուժային կառույցի աշխատող նշանակվի: