Քրդերի եւ թուրքերի զանգվածային ծեծկռտուք` Փարիզում

Փարիզում թուրք երիտասարդների` ահաբեկչության դեմ ուղղված բողոքի ակցիան ավարտվել է Քրդական բանվորական կուսակցության կողմնակիցների հետ ծեծկռտուքով: Քաղաքի ոստիկանությունը կարգուկանոնը վերահաստատելու համար արցունքաբեր գազ է կիրառել:

Փարիզի ոստիկանության տվյալներով` այսօր Բաստիլի հրապարակում մոտ 150 մարդ արտոնված ցույց է անցկացրել: Թուրք երիտասարդներն ահաբեկչության դեմ պայքարի կոչեր են արել, հարձակումների հիմնական թիրախը եղել է ՔԲԿ-ն: Խաղաղ ցույցն ավարտվել է` ՔԲԿ-ի կողմնակիցների հայտնվելով: Ծեծկռտուքի արդյունքում վնասվել է փողոցի ծածկը, նաեւ կոտրվել մոտակա ավտոբուսի կանգառը:

Ցույցի կազմակերպիչները հայտնում են տասնյակ վիրավորների մասին, սակայն ոստիկանությունն այդ փաստը չի հաստատում. տեղեկացնում է ИТАР-ТАСС-ը: