Հայաստանը խորացնելու է հարաբերությունները Ինտերպոլի հետ

ՀՀ նախագահ Սերժ Սարգսյանն այսօր ընդունել է Քրեական ոստիկանության միջազգային կազմակերպության գլխավոր քարտուղար Ռոնալդ Քենեթ Նոբլին:

Ողջունելով հյուրին` նախագահը նշել է, որ Հայաստանում բարձր են գնահատում Քրեական ոստիկանության միջազգային կազմակերպության գլոբալ առաքելությունը: «Մենք առանցքային ենք համարում կազմակերպության դերը հանցավորության դեմ պայքարում, ուստի ցանկություն ունենք է´լ ավելի խորացնել մեր հարաբերությունները Ինտերպոլի հետ»,- ասել է նա:

Հանրապետության ղեկավարի խոսքով` Քրեական ոստիկանության միջազգային կազմակերպության հետ համատեղ աշխատանքը Հայաստանում դիտարկվում է նաև որպես մեր մասնագետների պրոֆեսիոնալիզմի բարձրացման հնարավորություն: Սերժ Սարգսյանը բարձր է գնահատել Ռոնալդ Քենեթ Նոբլի անձնական ներդրումը Ինտեևպոլի արդիականացման գործում:

Ինտերպոլի գլխավոր քարտուղարն ընդգծել է, որ Հայաստանը և Ինտերպոլի հետ նրան կապող օղակը` Ազգային կենտրոնական բյուրոն, մեծ հեղինակություն ունեն կազմակերպությունում:

Նախագահը շնորհակալություն է հայտնել Ինտերպոլի գլխավոր քարտուղարությանը` Ազգային կենտրոնական բյուրոյին մշտական աջակցության համար և ընդգծել, որ հանցավորության դեմ պայքարի գործում համագործակցությունն անհրաժեշտություն է: