Եվրամիությունը հայտարարել է Թուրքիայի հետ համագործակցությունը խորացնելու մտադրության մասին

Շատ ոլորտներում Թուրքիայի հետ համագործակցությունը խորացնելու մտադրության մասին են հայտարարել Եվրամիության ղեկավարները 2021 թվականի հունիսի 24-ին կայացած գագաթնաժողովին հաջորդած հռչակագրում. հայտնում է Anadolu-ն։

Փաստաթուղթը հայտարարում է, որ Եվրամիության ղեկավարները «տեխնիկական աշխատանք» են սկսել Թուրքիայի հետ Մաքսային միությունը թարմացնելու ուղղությամբ: Հռչակագրում նշվում է նաև, որ ԵՄ-ն պատրաստ է բարձր մակարդակի երկխոսության Թուրքիայի հետ միգրացիայի, առողջության, կլիմայի, ահաբեկչության դեմ պայքարի և տարածաշրջանային խնդիրների վերաբերյալ:

Բացի դրանից՝ ԵՄ գագաթնաժողովի մասնակիցները «խնդրել են Եվրահանձնաժողովին՝ անհապաղ ներկայացնել պաշտոնական առաջարկ  Թուրքիայում և տարածաշրջանի այլ երկրներում գտնվող սիրիացի փախստականներին աջակցելու համար միջոցներ հատկացնելու վերաբերյալ»։

Ավելի վաղ հաղորդվել էր, որ Եվրահանձնաժողովի ղեկավար Ուրսուլա ֆոն դեր Լայենը մտադիր է ԵՄ գագաթնաժողովում քննարկել Սիրիայից միգրանտներ ունեցող երկրների լրացուցիչ ֆինանսավորումը: Դիվանագիտական որոշ աղբյուրներ Reuters-ին հայտնել են, որ խոսքը Թուրքիային 3,5 միլիարդ եվրո տրամադրելու մասին է։