Աշխարհում 450 մլն մարդ ունի հոգեկան խանգարում

Աշխարհում մոտ 450 միլիոն մարդ ունի հոգեկան այս կամ այն խանգարումը: Առողջապահության համաշխարհային կազամակերպության հաշվարկներով` 2020թ. դեպրեսիան հաշմանդամություն առաջացնող հիվանդությունների ցանկում կլինի երկրորդը. այս մասին տեղեկացնում է ՀՀ ԱՆ-ն:

ՀՀ-ում հոգեկան խանգարումներով հաշվառված քաղաքացիների թիվը մոտ 45.000 է:

Հոգեկան խանգարում կարող է ունենալ ցանկացած մարդ` անկախ տարիքից, սեռից, սոցիալ-տնտեսական կարգավիճակից, հասարակությունում գրաված դիրքից: Այդ իսկ պատճառով կարևոր է հասարակության բոլոր շերտերի ճիշտ իրազեկվածությունը տվյալ երևույթի վերաբերյալ:

Ամեն տարի հոկտեմբերի 10-ը նշվում է հոգեկան առողջության օր, որի հիմնական նպատակն է հասարակության ուշադրությունը հրավիրել հոգեկան առողջության հիմնախնդիրների վրա, որպեսզի խնդրի մասին մտածեն հասարակության բոլոր շերտերը:

Հոգեկան առողջության համաշխարհային համադաշնության կողմից հռչակված այս տարվա կարգախոսն է «Ծավալուն ներդրումներ` հանուն հոգեկան առողջության»: