Գուցե Յորգանցի կարծի՞քն էլ հաշվի առնեք (լրացված)

Վերջերս մամուլում շրջանառվում է, թե ֆրանսահայ հայտնի երգիչ Մարթեն Յորգանցի «Ճկույթիկ» երգի բառերը իրենը չեն, այլ մանկագիր Պատվական Խաչատրյանինը, ինչպես պնդում է մանկագրի դուստրը` Գայանե Խաչատրյանը:

Եվ ոչ ոք, կարծես, չի էլ մտածում, որ գուցե այս մասին արժե խոսել Յորգանցի հետ, հետո նոր աղմուկ բարձրացնել: Բանն այն է, որ Խաչատրյանն ասում է, թե Յորգանցը երբեւիցե չի նշել երգի խոսքերի հեղինակի անունը:

Ինչպես yerkir.am-ին տեղեկացրեց Յորգանցը, երգի մեղեդու հեղինակն ինքն է, իսկ ինչ վերաբերում է բառերին, ապա հնարավոր է, որ այն բանաստեղծությունից լինի:

«Ուղղակի բանաստեղծի անունը չգիտեի»,- ասաց նա:

Ի դեպ, Յորգանցը տեղեկացրեց նաեւ, որ այսուհետ բոլոր հնարավոր դեպքերում անպայման կնշի, թե ով է երգի բառերի հեղինակը, եւ շնորհակալ է Խաչատրյանից` արձագանքի համար:

«20 տարի առաջ ես գտել եմ այդ բանաստեղծությունը եւ 2 տուն վերցրել դրանից, իսկ կրկներգն ու մի տունն ինքս եմ գրել եւ մեղեդի հորինել»,- հայտնեց երգիչը: