Անտառափայտը տեղափոխում են առանց համարանիշների բեռնատարներով

Օրերս Վրաստանի Թելավի քաղաք տանող ճանապարհին «ԷկոԼուր» հասարակական կազմակերպության աշխատանքային խումբը հանդիպել է ծանոթ մի իրավիճակի` առանց համարանիշների բեռնատարի, որն անտառափայտ էր տեղափոխում:

Հայաստանում այս երեւույթի ռիսկերն ակնհայտ են, քանի որ շատ դժվար է ապօրինաբար հատված անտառափայտով բեռնված մեքենան նույնականացնել եւ մեղավորներին պատասխանատվության կանչել: Իսկ Վրաստանի իշխանություններն առաջարկում են այդ խնդրի «լուծման» իրենց մեթոդը:

Կառավարությունը երկրի անտառային սեկտորի օպտիմալացման նպատակով անտառօգտագործման արտոնագրի փոխարեն մտցրել է երկարաժամկետ վարձակալություն` 49 տարի ժամկետով` օրինականացնելով բնական ռեսուրսների անխնա օգտագործումը: Վրաց բնապահպանական կազմակերպությունները խստորեն քննադատում են իրենց կառավարության այս նախաձեռնությունը: Նրանք համոզված են, որ վարձակալված անտառները չեն պահպանվի:

«Ներկայումս Վրաստանի անտառները կազմում են երկրի տարածքի մոտ 40%-ը, իսկ ի՞նչ կլինի 49 տարի անց»,- գրում է «ԷկոԼուրը»: