Քննարկել Ղարաբաղյան կարգավորման գործընթացը

Նյու Յորքում գտնվող արտգործնախարար Էդվարդ Նալբանդյանը երեկ հանդիպել է Հարավային Կովկասում եւ Վրաստանում ճգնաժամի հարցերով Եվրոպական Միության հատուկ ներկայացուցիչ Ֆիլիպ Լեֆորի հետ: Քննարկվել են սեպտեմբերի վերջին Վարշավայում կայանալիք Արեւելյան գործընկերության գագաթաժողովի նախապատրաստական աշխատանքները: Արտգործնախարարը ողջունել է Արցախյան հիմնախնդրի կարգավորման հարցում ԵԱՀԿ Մինսկի խմբին աջակցելու` ԵՄ պատրաստակամությունը:

Էդվարդ Նալբանդյանի հաջորդ հանդիպումը ԱՄՆ փոխպետքարտուղար Ուիլյամ Բըրնսի հետ էր: Նրանք զրուցել են հայ-ամերիկյան բարեկամական գործընկերության զարգացմանն առնչվող հարցերի շուրջ: Նախարար Նալբանդյանն ու փոխպետքարտուղար Բըրնսը անդրադարձել են նաեւ Հարավային Կովկասի տարածաշրջանային խնդիրներին` հատկապես Արցախյան հիմնախնդրի կարգավորման գործընթացին: Այդ համատեքստում Էդվարդ Նալբանդյանը բարձր է գնահատել ԱՄՆ դրական ներգրավվածությունը եւ գործունեությունը՝ որպես ԵԱՀԿ Մինսկի խմբի համանախագահ: