Կեղծ դեղը 100 տոկոսանոց բուժում է խոստանում

Գիտնականները խոսում են պլացեբոյի (կեղծ դեղ) ազդեցության մասին: Գաղտնիք չէ, որ մեր վերաբերմունքը կարող է ազդել այն բանի վրա, թե ինչպես է օրգանիզմը հակազդում բուժմանը: Այսինքն` հավատը, որ ամեն ինչ լավ կանցնի, շատ կարևոր է. տեղեկացնում է Doctors.am-ը:

Հետազոտությունները ցույց են տվել, որ պլացեբոյի ընդունումը նպաստում է բնական ցավազրկողների արտադրմանը, փոխում է նեյրոնների` ազդանշաններ փոխանցելու մեխանիզմը, նվազեցնում է արյան ճնշումը և ակտիվացնում է իմունային պատասխանը: Մյուս կողմից` եթե մարդը հավատում է, որ դեղամիջոցն իրեն կվնասի, արդյունքը լրիվ հակառակը կլինի` ընդհուպ մինչև մահ:

Թեդ Կապտչուկը Հարվարդի բժշկական դպրոցից իր գործընկերների հետ ստուգել է դա մի խումբ մարդկանց վրա, ովքեր ունեին հաստ աղիքի բորբոքում: Հիվանդները ստացել են «դատարկ դեղահաբ», ընդ որում` քաջ տեղյակ լինելով, որ այն, իրականում, օգուտ չի կարող տալ: Արդյունքում` կամավորները, միևնույն է, հաստատել են, որ ավելի լավ են զգում իրենց:

Ստացվում է, որ մարդը կարող է ինքնուրույն բուժվել` համոզելով ինքն իրեն, որ սովորական ջուրն ունի բուժիչ ազդեցություն: