Որտե՞ղ է վերջը, այնտեղ, որտեղ սկիզբն է

Երբ մարդիկ Հիսուսին հարցրին, թե որտեղ է իրենց վերջը, Քրիստոս պատասխանեց` այնտեղ, որտեղ սկիզբն է: Այս հիմնական գաղափարն է արտահայտվում իրավաբան Յուրի Սարգսյանի «Արարատյան լեռների գաղտնիքները» ռուսալեզու գրքում, որն իրավաբանի առաջին`«Ո՞վ ես դու, հայ» գրքի վերամշակված տարբերակն է:

Գրքում հեղինակը, հենվելով բազմաթիվ պատմական վկայությունների, աշխարհագրական և հնագիտական հայտնագործությունների, տարբեր ժողովուրդների լեգենդների ու առասպելների վրա, փորձել է վերծանել հին ժամանակների իրադարձությունները:

«Սա ոչ թե գիտական գիրք է, այլ գիրք մի մարդու մտորումների մասին, ով փնտրում է հարցերի պատասխաններ` Հայաստանը համարելով տիեզերքի կենտրոն»,- ասում է Յուրի Սարգսյանը:

Պատմաբան Անժելա Տերյանի կարծիքով` մենք պետք է ճանաչենք մեր պատմությունը` այն պատշաճ կերպով ներկայացնելու համար: «Որովհետև, եթե ուզում ենք առաջ նայել, պետք է տեսնենք, թե ինչ կա ետևում: Գիրքը շատ հետաքրքիր էր` մեկ շնչով եմ կարդացել»,- ասաց պատմաբանը:

Քաղաքական գիտությունների դոցենտ Արմեն Այվազյանը գրքում արված հետևությունները համարում է տրամաբանական: «Օրինակ` քաղաքակրթական առումով Հայաստանը դիտվում է որպես աշխարհի կենտրոն: Սա նացիոնալիզմ չէ, այլ առողջ դատողություն»,- ավելացրեց նա:

Նշենք, որ «Արարատյան լեռների գաղտնիքները» գրքի հիման վրա «Հայորդի» ՀԿ-ն նկարահանել է համանուն վավերագրական ֆիլմ: