Գիտաժողով` նվիրված ԼՂՀ 20-ամյակին

Երեւանի Վ. Բրյուսովի անվան պետական լեզվաբանական համալսարանում այսօր մեկնարկեց «Նոր մոտեցումներ ԼՂՀ հիմնահարցին» խորագրով գիտաժողովը, որը նվիրված է Լեռնային Ղարաբաղի Հանրապետության հռչակման 20-ամյակին:

ԵՊԼՀ ռեկտոր, քաղաքագետ Սուրեն Զոլյանը նշեց, որ նման գիտաժողովները նպաստում են ներկայիս Լեռնային Ղարաբաղի մասին առավել ճշգրիտ պատկերացումներ կազմելուն:

Նրա խոսքով` այսօր Լեռնային Ղարաբաղի առջեւ ծառացած են երկու խումբ խնդիրներ` ներքին եւ արտաքին: Եվ այսօր` քսան տարի անց, նոր մոտեցումներ են պետք դրանք լուծելու համար:

«Արտաքին խնդիրներից առանցքայինը Լեռնային Ղարաբաղի Հանրապետության միջազգային ճանաչումն է, ինչի ուղղությամբ մեծ աշխատանքներ են տարվում»,- նշեց Ս.Զոլյանը:

Անդրադառնալով ներքին խնդիրներին` քաղաքագետը կարեւորեց այն, որ Լեռնային Ղարաբաղն ունի պետությանը բնորոշ բոլոր հատկանիշները եւ օրեցօր ավելի ակնհայտ է դառնում նրա զարգացումը:

Գիտաժողովին զեկույցներով հանդես եկան նաեւ ներկայացուցիչներ, փորձագետներ, վերլուծաբաններ, ինչպես նաեւ ուսանողներ ՀՀ գիտությունների ազգային ակադեմիայից, Հայաստանի պետական մանկավարժական համալսարանից, Արցախի պետական համալսարանից:

«Լեռնային Ղարաբաղի հիմնախնդրի վերաբերյալ տեսական մոտեցումների մշակումը խիստ կարեւոր է` հետագայում դրանք բանակցային պրակտիկայում կիրառելու տեսանկյունից»,- իր զեկույցում նշեց քաղաքագիտական գիտությունների դոկտոր, ԱԺ պատգամավոր Տիգրան Թորոսյանը: