ՉՈՐՐՈՐԴ ԻՆՔՆԻՇԽԱՆՈՒԹՅՈՒՆ. Ընտրություններին "մաքուր" են գնալու

«ՉԻ» տեղեկություններով` շաբաթ օրը առավոտվանից Սերժ Սարգսյանի մոտ են հավաքվել երկրի բարձրաստիճան պաշտոնյաները` բլոկ առ բլոկ: Նախաձեռնության հեղինակը Սերժ Սարգսյանն է եղել:

Նա սկզբում իր մոտ է կանչել ուժային կառույցների պատասխանատուներին: Պատմում են, որ հանդիպումները երկար են տևել, և պաշտոնյաները խուճապահար են դուրս եկել Սերժ Սարգսյանի մոտից:

Կիրակի օրը ՀՀ վարչության պետ Տիգրան Սարգսյանն է հավաքել բոլոր նախարարներին. ամենայն հավանականությամբ` Սերժ Սարգսյանի հետ ունեցած խոսակցություններից հետո: Մեր տեղեկություններով` Սերժ Սարգսյանը հանձնարարական է տվել ուժայիններին` պատժել իրենց այն ենթականերին, որոնք առավել աչքի են ընկնում բացասական վարքով: «Մաքրեք ձեզ ու ձեր միջավայրը. ընտրություններին մաքուր ենք գնալու»,- մոտավորապես այսպիսի ձևակերպմամբ պահանջ է ներկայացրել Սերժ Սարգսյանը:

«ՉԻ» տեղեկություններով` ՀՀ ոստիկանապետ Ալիկ Սարգսյանի հրամանով ժամանակավորապես դադարեցվել են Մարգար Օհանյանի աշխատանքային լիազորությունները` մինչև հարուցված քրեական գործի նախաքննության և դատաքննության ավարտը: Բացի այս, մեր տեղեկություններով, երեկ ոստիկանապետին դիմում է ներկայացրել Նոր Նորք վարչական շրջանի ոստիկանության պետ, գնդապետ Մուշեղ Օհանյանը, որը Մարգար Օհանյանի հարազատ եղբայրն է: