Ադրբեջանի ԱԳՆ-ն ընդդեմ Google-ի

Ադրբեջանի արտգործնախարարությունը հիստերիայի մեջ է. Google-ն  իր օնլայն քարտեզներում իբր աղավաղում է «օկուպացված» ադրբեջանական տարածքների անվանումները` դրանց հայերեն տարբերակները նշելով:

Երեկ այդ մասին Ադրբեջանի ԱԳՆ պաշտոնական հաղորդագրություն է տարածել ու կոչ արել ադրբեջանցիներին` ակտիվ քայլեր ձեռնարկել այդ տարածքների ադրբեջանական անվանումները վերականգնելու ուղղությամբ: «Այս հարցը արտգործնախարարության մշտական ուշադրության կենտրոնում է: Մենք այդ ուղղությամբ պարբերաբար համակարգված աշխատանք ենք իրականացնում դեսպանատների եւ այլ երկրներում հավատարմագրված մեր դիվանագետների հետ»,- ասել է Ադրբեջանի ԱԳՆ մամուլի ծառայության առաջին քարտուղար Էլման Աբդուլաեւը:

Նա հիշեցրել է, որ Google Earth-ը բաց ծրագիր է, եւ Ադրբեջանի քաղաքացիները կարող են շտկումներ կատարել  քարտեզներում:

Google-ի քարտեզներում Լեռնային Ղարաբաղի բնակավայրերի եւ շրջակա տարածքների տեղանունները նշված են միայն հայերեն տարբերակներով, իսկ ադրբեջանցիները պահանջում են վերականգնել դրանց ադրբեջանական անունները` Ստեփանակերտի փոխարեն` Խանքենդի, Քարվաճառի փոխարեն` Քելբաջար, Վարանդայի փոխարեն` Ֆիզուլի եւ այլն: