Իրանը եւ Սիրիան նոր գազամուղ են կառուցելու

Իրանական գազային ազգային ընկերության ներկայացուցիչները հայտարարել են, որ Սիրիայի եւ Իրաքի գործընկերների հետ պայմանավորվածություն են ձեռք բերել գազամուղի նոր ճյուղ կառուցելու վերաբերյալ, որը հնարավորություն կտա ավելացնել իրանական գազի արտահանումը. տեղեկացնում է Reuters-ը:

«Այդ պայմանագիրը ստորագրվելու է հուլիսի 25-ին»,- կիսապաշտոնական զրույցում տեղական ԶԼՄ-ներին հայտնել է ընկերության ղեկավար Ջավադ Օջին: Նա հավելել է, որ «իրանական գազը Սիրիա կհասնի Իրաքով, իր հերթին, Սիրիան պատրաստ է օրական 20-25 մլն խոր. մ գազ ձեռք բերել»:

Գործարքի արժեքը 10 մլրդ դոլար է, նախագիծն իրականացվելու է 3-5 տարում:

Ըստ Օջիի` Իրանում օրական արդյունահանվում է 600 մլն խոր. մ գազ, որից 37 մլն-ը արտահանվում է: Ծրագրվում է, որ Հարավային Պարս հանքավայրում նախատեսված աշխատանքների ավարտից հետո երկրի արտադրական հզորությունը կավելանա մինչեւ 1,2 մլրդ խոր. մ, որից կարտահանվի 250 մլն-ը: