Մեղադրող լրագրողին հայտնաբերել են մահացած

Լրագրող Շոն Հորը, որն առաջինն էր News of the World թերթի նախկին խմբագիր Էնդի Կոուլսոնին մեղադրել ապօրինի գաղտնալսումների մեջ, հայտնաբերվել է մահացած` Ուոտֆորդ քաղաքում գտնվող իր տանը:

Ոստիկանությունն արդեն տեղեկացրել է, որ լրագրողի մահվան հանգամանքներում որեւէ կասկածելի բան չի տեսնում, սակայն հետաքննությունը շարունակվում է:

Հորը հայտարարել էր, որ Կոուլսոնը ոչ միայն գիտեր հեռախոսազրույցների գաղտնալսումների մասին, այլեւ հայտնի մարդկանց կյանքի մասին բացառիկ նյութերի հետեւից ընկած խրախուսում էր իր աշխատակիցներին` ապօրինությունների դիմել: Լրագրողը BBC-ին տված հարցազրույցում հայտարարել էր, որ խմբագիրն անձամբ իրեն համոզել էր գաղտնալսել հեռախոսային խոսակցությունները:

Նշենք, որ գաղտալսումների հետ կապված սկանդալի պատճառով մոտ մեկ դարից ավելի տպագրվող News of the World թերթը փակվել է: Նույն պատճառով Լոնդոնի ոստիկանության պետի տեղակալ Ջոն Յեթսը հրաժարական էր տվել: Իր պաշտոնից հրաժարվել էր նաեւ Յեթսի ղեկավար` Սկոթլենդ Յարդի պետ Փոլ Ստիվենսոնը, երբ բացահայտվել էր, որ News International-ի լրագրողները ոտիկաններին կաշառք են տվել: Ստիվենսոնը կասկածվում է նաեւ News of the World-ի նախկին փոխխմբագիր Նիլ Ուոլիսի հետ կապերի մեջ, որին որպես PR-խորհրդատու էր վարձել: