Քրեական գործ՝ բնապահպանական տեսչության աշխատողի նկատմամբ

Պարզվում է, որ բնապահպանները ոչ թե բնությունն են պահպանում, այլ զբաղված են բնության ոչնչացմամբ:

Ասկերանի շրջանի Պատարա գյուղի բնակիչ, ԼՂՀ կառավարությանն առընթեր շրջակա միջավայրի և բնական ռեսուրսների վարչության աշխատակազմի բնապահպանական պետական տեսչության տարածքային վերահսկողության բաժնի գլխավոր մասնագետ Սասուն Հարությունյանի նկատմամբ քրեական գործ է հարուցվել. տեղեկացնում է Արցախի գլխավոր դատախազության կայքը:

Բանն այն է, որ Սասուն Հարությունյանը, պաշտոնեական դիրքն օգտագործելով, 2010 թ. գարնանը Ասկերանի շրջանի Պատարա համայնքին պատկանող «Դերին թաղ» կոչվող տեղամասում ապօրինի հատել է ԼՂՀ Կարմիր գրքում գրանցված 80 սմ տրամագծով հունական չորացած ընկուզենի:

2011թ. հունվար ամսին նույն համայնքի «Նոխուտտու» կոչվող տեղամասում նա դարձյալ ապօրինի հատել է նույն տեսակի 80 սմ տրամագծով չոր եւ 76 սմ տրամագծով թաց մեկական ծառ ու իրացրել «ԱԲԳ Թրեյդինգ» ՍՊԸ-ի միջոցով` դրանով Պատարա համայնքին պատճառելով առանձնապես խոշոր չափերի հասնող` 1.207.500 դրամ գումարի գույքային վնաս:

Նախաքննությունն իրականացնում է ԼՂՀ ոստիկանության քննչական վարչությունը: