Կարգավորման հարցում իրական առաջընթաց ակնկալել դեռ վաղ է

Սկզբունքների վերջնական համաձայնեցման համար դեռ վաղ է. «Երկիր»-ի հետ զրույցում անդրադառնալով Կազանում կայանալիք հանդիպմանը` կարծիք հայտնեց ՀՀ ԳԱԱ արեւելագիտության ինստիտուտի տնօրեն Ռուբեն Սաֆրաստյանը` հավելելով, որ դա պայմանավորում է այն հանգամանքով, որ Ադրբեջանը մինչեւ հիմա չի ընդունում ազգերի ինքնորոշման իրավունքը, իսկ մինչեւ նա դա չընդունի, երկու նախագահները չեն կարողանա սկզբունքները համաձայնեցնել:

Խոսելով Ղարաբաղյան հակամարտության կարգավորման ներկա փուլի մասին` արեւելագետը նշել է. «Կարծում եմ, որ մի կողմից Մինսկի խմբի երեք միջնորդները փորձեր են անում բանակցային գործընթացն արագացնելու ուղղությամբ, բայց, մյուս կողմից, մենք տեսնում ենք, որ Ադրբեջանը գնալով ուժեղացնում է իր ռազմատենչ հայտարարությունները եւ փորձում է բանակցային գործընթացի վրա ներազդել ուժ կիրառելու, պատերազմ սկսելու սպառնալիքների միջոցով: Այս երկու գործընթացներն են, որոնք, իմ պատկերացմամբ, գերակշռում են: Եվ քանի դեռ Ադրբեջանը շարունակում է այս քաղաքականությունը` ուժ կիրառելու սպառնալիքի դիվանագիտությունը, ապա որեւիցե իրական առաջընթաց խաղաղ կարգավորման բնագավառում լինել չի կարող, որքան էլ որ համանախագահները փորձեն արագացնել գործընթացը»: