Մինչ Հայաստանը մամուլի ազատության հարցում առաջընթաց է գրանցել, Թուրքիան դարձել է այդ հարցում ամենամեծ անկում ունեցած երկիրը

Freedom House-ը հրապարակել է «2017 թվականին մամուլի ազատությունը» զեկույցը:

Փորձագետները գնահատել են 199 երկրների զանգվածային լրատվամիջոցները 0-100 բալանոց համակարգով՝ երեք դասակարգումներում՝ ազատ, մասամբ ազատ և ոչ ազատ:

Զեկույցում Հայաստանը զբաղեցրել է 137-րդ հորիզոնականը՝ հայտնվելով «ոչ ազատ» մամուլ ունեցող երկրների շարքում: Նշվել է, որ Հայաստանն ընդհանուր ազատությունների մակարդակով «մասամբ ազատ» երկրների ցուցակում է, իսկ համացանցի ազատությամբ՝ «ազատ երկրների» ցուցակում:

Զեկույցում Ռուսաստանը հայտնվել է 174-րդ հորիզոնականում՝ ստանալով 83 միավոր: ՌԴ-ն, ինչպես նաև Ադրբեջանը, Իրանն ու Թուրքիան հայտնվել են «անազատ» երկրների ցուցակում: Զեկույցում Ադրբեջանն ու Իրանը զբաղեցրել են 190-րդ տեղը, իսկ Թուրքիան՝ 163-րդ:

Վարկանիշային ցուցակում Վրաստանը 102-րդն է՝ ստանալով 50 միավոր: Վրաստանը, ինչպես նախորդ տարի,  շարունակում է մնալ «մասամբ ազատ» մամուլ ունեցող երկրների շարքում, որը լավագույն ցուցանիշն է տարածաշրջանում:

Ըստ Freedom House-ի՝ աշխարհում մամուլի մակարդակը վերջին 13 տարիների ընթացքում ամենացածրն է:

Կազմակերպությունը նաև անդրադարձել է այն երկրներին, որտեղ տարվա ընթացքում մամուլի ազատության հարցում գրանցվել են ամենամեծ անկումները: Այդ երկրներն են՝ Թուրքիան, Լեհաստանը, Բուրունդին, Հունգարիան, Բոլիվիան, Սերբիան և Կոնգոյի Դեմոկրատական Հանրապետությունը: