Սեւանի ավազանի աղբավայրերը կվերահսկվեն

Գեղարքունիքի մարզի 92 համայնքներն ունեն 27 աղբավայր, որոնցից 5-ը` Սեւանի, 5-ը` Գավառի, 12-ը` Մարտունու, 2-ը` Վարդենիսի, 3-ը` Ճամբարակի տարածաշրջաններում:

Ինչպես «Երկիր»-ին հայտնեցին Հայաստանի քաղաքաշինության նախարարությունից, դրանք չվերահսկվող, տարերայնորեն ձեւավորված աղբավայրեր են: Ինչպես ցույց են տվել ուսումնասիրությունները, դրանք չեն համապատասխանում բնապահպանական եւ սանիտարական նորմերին` հանդիսանալով ջրի, հողի եւ օդի աղտոտման աղբյուրներ: Մասնագետները նշում են, որ այդ աղբավայրերը խոչընդոտում են Սեւանի էկոհամակարգի վերականգնմանն ու պահպանմանը:

Պարզից էլ պարզ է, որ Սեւանի ներկայիս էկոլոգիական վիճակը պայմանավորված է ոչ միայն լճային բնական բացասական գործընթացներով, այլեւ լճի ջրհավաք ավազանում արդյունաբերության, գյուղատնտեսության եւ տնտեսության այլ ճյուղերի` էկոլոգիապես չհիմնավորված գործունեության հետ: Արդյունքում` լճում անհամեմատ ավելացել են թունավոր նյութերի քանակները, անթույլատրելի մեծությունների են հասել Սեւանը թափվող գետերի մեխանիկական, քիմիական, կենսաբանական աղտոտման ծավալները:

Էկոլոգիական իրավիճակի բարդությունը հիմնականում պայմանավորված է լճի ջրհավաք ավազանի ուրբանիզացված միջավայրով. մարզում գոյություն ունի 92 համայնք, որոնց բնակչությանը ամռանը ավելանում են հանգստացողները:

Ըստ քաղաքաշինության նախարարի տեղակալ Ավագ Հակոբյանի` մարզում աղբավայրերի ստեղծման ժամանակ հաշվի չեն առնվել բազմաթիվ սահմանափակումներ` մակերեւույթային ջրերի հոսքը, հեղեղաբեր գետակները, թռչունների ձվադրման վայրերը, գրունտային ջրերի բարձր մակարդակը եւ այլն: Հաշվի չեն առնվել նաեւ ուժեղ քամիները, որոնք տարածում են աղբը:

Ի դեպ, կառավարության առաջիկա նիստում քննարկման կդրվի «Սեւանա լճի ավազանում աղբավայրերի տեղաբաշխման գլխավոր ուրվագծի» որոշման նախագիծը: Հետագայում աղբավայրերում հավաքված աղբը կտեղափոխվի եւ կմշակվի Գագարինում ստեղծվելիք աղբամշակման գործարանում: