Արցախը անկախ` նաեւ էներգետիկ առումով

Արցախում արդեն սկսել են մտածել այլընտրանքային էներգակիրների մասին. օրերս կառավարության հավանությանն է արժանացել այլընտրանքային էներգակիրների կիրառման հայեցակարգը։

Կառավարության նիստի ժամանակ վարչապետ Արա Հարությունյանը կարեւորել է սեփական ռեսուրսների վրա գործող էլեկտրական եւ ջերմային էներգիայի արտադրությունը, ինչը կկրճատի նաեւ ներկրվող էներգակիրների ծավալը: Նրա տեղեկացմամբ՝ արդեն շահագործման է հանձնվել 2 ՀԷԿ, եւս 4-ը նախատեսվում է շահագործման հանձնել մինչեւ տարեվերջ։

Այս ամենի արդյունքում, ըստ վարչապետի, մոտակա 3 տարիների ընթացքում Արցախը կարող է էլեկտրաէներգիայի առումով անկախ լինել, ինչպես նաեւ հնարավորություն կունենա էլեկտրաէներգիա արտահանել։

Նա միաժամանակ տեղեկացրել է, որ այլընտրանքային էներգակիրներից հատուկ ուշադրություն է դարձվելու բիովառելիքի արտադրությանը, որի զարգացման համար Արցախում կան բոլոր հնարավորությունները: Ոլորտում առաջին քայլերն արդեն արված են, եւ արձանագրված արդյունքները մեծ հեռանկարներ են խոստանում։

Կառավարության ղեկավարի խոսքերով` մոտ ապագայում բիովառելիքով հնարավոր կլինի բավարարել ջեռուցման ներքին պահանջները, կստեղծվեն ջերմաէլեկտրակայաններ, որոնք կնպաստեն նաեւ ջերմոցային տնտեսությունների հիմնմանը։

Բացի այդ` ներկայումս Մարտակերտի շրջանում ուսումնասիրություններ են կատարվում քարածխի արդյունահանում սկսելու նպատակով. այստեղ եւս լավ արդյունքներ են ակնկալվում։