Անցում նոր համակարգին` 23 տարում

Պետք է հրաժարվել ներկայումս գործող կենսաթոշակային համակարգից եւ 23 տարվա ընթացքում ամբողջությամբ անցնել նորին` կուտակայինին: Սա է կենսաթոշակային համակարգի բարեփոխումների ծրագրի նպատակը. այն ներառում է մոտ 170 օրինագիծ եւ նորմատիվ ակտեր:

Այսօր լրագրողների հետ հանդիպման ժամանակ ԱԺ սոցիալական հարցերի մշտական հանձնաժողովի նախագահ Հակոբ Հակոբյանը նշեց, որ ներկայումս առաջին խնդիրներից մեկն այն է, որ հասարակությունը տեղյակ չէ այս համակարգից` մարդկանց մոտ 20 տոկոսը միայն գաղափար ունի դրա մասին:

«Խոսե Պինիերան այս ոլորտում բարեփոխումների հայրն է, եւ հետաքրքիր էր ճանաչել Չիլիի փորձը: Նրա հետ հանդիպման ժամանակ պարզ դարձավ, որ տեղի բնակչության 95 տոկոսը մասնակցում է համակարգին, եւ արդեն իսկ  200 միլիարդ դոլար է կուտակվել ֆոնդերում»,- նշեց նա:

Համակարգի կարեւորագույն սկզբունքներից մեկն այն է, որ ներդրումային հիմնադրամների ղեկավարները պետք է պետական պաշտոնյաներ չլինեն, քանի որ նրանք, անկախ ամեն ինչից, չեն կարող «անտարբեր» լինել քաղաքականության նկատմամբ, իսկ կենսաթոշակառուների գումարները չպետք է շրջանառվեն քաղաքական նպատակներով: