ՀՖՖ-ն Անդրեասյանին ոչ ցանկալի անձ չճանաչեց

Այսօր կայացավ ՀՖՖ գործադիր կոմիտեի երկար սպասված նիստը, որին հրավիրված էին միայն մարզական լրատվամիջոցների լրագրողները: Օրակարգում քննարկվել է 7 հարց:

Առաջին կետով քննարկվել է  «Արարատի» գլխավոր մարզիչ Արկադի Անդրեասյանի և Totalfootball.am-ի ֆոտոթղթակից Աշոտ Առուշանյանի միջև տեղի ունեցած միջադեպը: ՀՖՖ կարգապահական կոմիտեն գործադիր կոմիտեին առաջարկել էր Արկադի Անդրեասյանին ճանաչել ֆուտբոլում անցանկալի անձ:

Ինչպես  տեղեկացնում է TF-ն, ՀՖՖ նախագահ Ռուբեն Հայրապետյանը գործադիր կոմիտեին առաջարկել է Անդրեասյանին  ֆուտբոլում ոչ ցանկալի անձ չճանաչել և բավարարվել միայն զգուշացմամբ, ինչպես նաև ուժի մեջ թողնել 10 խաղի որակազրկումը և 250 հազար դրամ ֆինանսական տուգանքը: Գործկոմը միաձայն ընդունել է  առաջարկը:

Հիշեցնենք, որ ապրիլի 23-ին կայացած Հայաստանի առաջնության հերթական տուրի «Փյունիկ»-«Արարատ» խաղի ընդմիջմանը Արկադի Անդրեասյանն իրեն ուղեկցող անձանց հետ ծեծի էր ենթարկել ֆոտոլրագրողին:

Տուժող կողմը նամակով  դիմել է ՀՖՖ-ին` խնդրելով համապատասխան միջոցներ կիրառել Անդրեասյանի նկատմամբ, իսկ ֆուտբոլում ոչ ցանկալի անձ ճանաչելու մասին նամակում ոչինչ չի ասվել:

Միջադեպի քրեականացման մասին դեռևս ոչինչ հայտնի չէ: