Սերժ Սարգսյանն այցելել է Արմավիրի մարզ

Հայաստանի նախագահ Սերժ Սարգսյանն այսօր այցելել է Արմավիրի մարզի Մերձավան գյուղում գտնվող «Պոլիմեր Տրուբ» ՍՊԸ-ի նորակառույց գործարանային համալիր. տեղեկացնում է ՀՀ նախագահի մամուլի ծառայությունը:

Գործարանի բացման հանդիսավոր արարողությունից հետո հանրապետության ղեկավարը շրջել է ձեռնարկության արտադրամասերում, ծանոթացել ընկերության հեռանկարային զարգացման ծրագրերին, ըստ որոնց` նախատեսվում է գործարանի ընդլայնում և նոր ապրանքատեսակների արտադրություն:

«Պոլիմեր Տրուբ»-ի ստեղծման հիմքերը դրվել են 2009 թ.` սիրիահայ գործարարների կողմից, ովքեր նախաձեռնել են Հարավային Կովկասում եզակի՝ խոշոր տրամաչափի խողովակների արտադրություն` նկատի առնելով հանրապետությունում սպառման ծավալներն ու տնտեսության որոշակի ճյուղերում` հիդրոէներգետիկա, ոռոգման համակարգ, ճանապարհային շինարարություն և այլն, դրանց մեծ պահանջարկը: