Չեռնոբիլի ատոմակայանի 25-րդ տարելիցին

ՄԱԿ-ի Գլխավոր ասամբլեայի 65-րդ նստաշրջանի այսօրվա լիագումար նիստը նվիրված է լինելու Չեռնոբիլի ատոմակայանի վթարի 25-րդ տարելիցին: Նիստի մասնակիցները կքննարկեն աղետի հետեւանքները նվազագույնի հասցնելուն ուղղված միջազգային համագործակցությունը եւ համատեղ ջանքերի համակարգումը:

Երեկ այդ տարելիցի կապակցությամբ ՄԱԿ-ի գրասենյակում բացվել է նաեւ լուսանկարների ցուցահանդես:

Անցյալ շաբաթ ՄԱԿ-ի գլխավոր քարտուղար Պան Գի Մունը Ուկրաինա կատարած այցի ժամանակ այցելել է Չեռնոբիլ` ընդգծելու համար ուշադրությունը միջուկային անվտանգության նկատմամբ, հատկապես` ճապոնական ատոմակայաններում ստեղծված իրադրությունից հետո:

Չեռնոբիլի ատոմակայանի վթարը տեղի է ունեցել 1986 թվականի ապրիլի 26-ին, որի հետեւանքով 30 կմ շառավղով տարածք ենթարկվել է ռադիոակտիվ թունավորման, տուժել են 19 ռուսաստանյան շրջաններ` 60 հազար քառ. կմ տարածքով եւ 2,6 միլիոն բնակչությամբ, Բելառուսի 46,5 քառ. կմ տարածք, Ուկրաինայի 50 հազար քառ. կմ տարածք: