Ադրբեջանական ապատեղեկատվությունը զավեշտալի է

Ադրբեջանն այսօր հերթական ապատեղեկատվությունն է տարածել, ասելով, որ այսօր հայկական կողմը հերթական անգամ խախտել է հրադադարի ռեժիմը: ՀՀ պաշտպանության նախարարի մամուլի քարտուղար Դավիթ Կարապետյանը տարածված տեղեկատվությունը զավեշտալի է համարել:

«Ադրբեջանի ապատեղեկատվության գրչակները անգամ մոռանում են տեխնիկական հնարքներ գործադրել, որպեսզի քողարկեն իրենց տեղեկատվության շինծու լինելը: Ասվածի վկայություն են ադրբեջանական 1news.az լրատվամիջոցի ապրիլ ամսվա հաղորդագրությունները. ապրիլի 7-ին, 11-ին, 14-ին, 15-ին, 18-ին, 22-ին հրադադարի ռեժիմի խախտման արձանագրում մշտապես ժամը 10:04-ին ու մշտապես Ֆիզուլիի շրջանում, կամ ապրիլի 4-ին, 5-ին, 19-ին հրադադարի ռեժիմի խախտման արձանագրում մշտապես 09:56-ին ու մշտապես  Թարթառի շրջանում: Այս ամենը խոսում է այն մասին, որ այդ հայտարարությունները ուղարկվում են մեխանիկորեն ու արդեն նախանշված համակարգչային ծրագրավորմամբ»,-ասված է Regnum գործակալությանը տված մամուլի խոսնակի պատասխանում: