Ձերբակալել են լրագրողին

Ոստիկանությունը ձերբակալել է բրիտանական News of the World թերթի ավագ լրագրող Ջեմս Բեզերըփին` հեռախոսազրույցները գաղտնալսելու մեղադրանքով: Ինչպես գրում է The Guardian-ը, Բեզերըփին կալանավորել են չորեքշաբթի առավոտյան, այժմ նա գտնվում է լոնդոնյան մեկուսարաններից մեկում:

Ի դեպ, նույն մեղադրանքով կալանավորվել են նաեւ այս պարբերականի այլ լրագրողներ` խմբագրի նախկին օգնական Էդմոնսոնը եւ Թարլբեկը, ովքեր ոստիկանություն են ներկայացել ինքնակամ:

Բրիտանիայի արքայական ընտանիքը նման սկանդալի կենտրոնում էր հայտնվել նաեւ չորս տարի առաջ: 2006 թվականին News of the World-ի խմբագիր, 48-ամյա Քլայվ Գուդմենը դատարանում խոստովանել էր, որ գաղտնալսել է արքայական ընտանիքի անդամների բջջային հեռախոսազրույցները: Գուդմենը ազատազրկվել էր 4 ամիս:

Ի դեպ, News of the World-ը պատկանում է Ռուպերտ Մերդոկի մեդիահոլդինգին: