Սպառնում են ոչնչացնել դեպի Ստեփանակերտ թռչող ինքնաթիռները

Պաշտոնական Բաքուն իրավասու է ոչնչացնել Ստեփանակերտի օդանավակայանում վայրէջք կատարող ինքնաթիռները. ըստ ԱՊԱ գործակալության` հայտարարել է Ադրբեջանի քաղաքացիական ավիացիայի պետական վարչության տնօրեն Արիֆ Մամեդովը:

Նա ասել է, որ իրենք քայլեր են ձեռնարկում Ստեփանակերտում օդանավակայանի շինարարությունը կասեցնելու ուղղությամբ, եւ անցյալ տարվա հոկտեմբերին այդ կապակցությամբ նախազգուշացում է ուղարկվել Քաղաքացիական ավիացիայի միջազգային կազմակերպությանը (ICAO):

«Մենք հայտարարել ենք, որ Ղարաբաղի մեր օդային տարածքը փակ է: «Ավիացիայի մասին» օրենքի համաձայն` նախատեսվում է այդ տարածքում վայրէջք կատարող ինքնաթիռների ֆիզիկական ոչնչացում»,- ընդգծել է Մամեդովը:

Նա նաեւ հավելել է, որ Քաղաքացիական ավիացիայի միջազգային կազմակերպությունը պատասխան նամակում կոչ է արել միանալ մի շարք կոնվենցիաների, ջանքեր գործադրել` տարածաշրջանում բացասական երեւույթներից խուսափելու համար:

«Համաձայնեցնելով պաշտպանության նախարարության հետ` մենք դարձյալ նամակ ուղարկեցինք` հայտարարելով, որ այդ օդային տարածքը փակ է եւ գտնվում է Ադրբեջանի ռազմաօդային ուժերի վերահսկողության տակ»,- ասել է Մամեդովը` հավելելով, որ իրենք իրենց հերթին խորհուրդ են տվել ICAO-ին բացասական երեւույթներից խուսափելու համար այդ մասին տեղեկացնել հակառակորդ կողմին: ICAO-ն էլ Ադրբեջանի նամակը փոխանցել է Հայաստանին: