ԱՊՊԱ, ԱՊՊԱ մինչեւ վերջ

2011 թ. մարտի 1-ին Ֆինանսական համակարգի հաշտարարի գրասենյակի եւ Հայաստանի ավտոապահովագրողների բյուրոյի միջեւ կնքվել է համագործակցության պայմանագիր, ըստ որի` կողմերը կփոխանակեն անհրաժեշտ տեղեկատվություն, կկազմակերպեն ԱՊՊԱ ոլորտում սպառողների շահերի պաշտպանության հետ կապված համատեղ միջոցառումներ:

Ինչպես նշեց Ֆինանսական համակարգի հաշտարարի գրասենյակի տնօրեն Փիրուզա Սարգսյանը, համաձայնագրի կնքման հիմնական նպատակը հաշտարարի եւ բյուրոյի միջև համագործակցության կարգավորումն է։

Փիրուզա Սարգսյանի տեղեկացմամբ` այս տարի, ԱՊՊԱ-ի հետ կապված, գրանցվել է ընդամենը 29 զանգ-բողոք եւ 2 գրավոր բողոք:

Հայաստանի ավտոապահովագրողների բյուրոյի գործադիր տնօրեն Վահան Ավետիսյանը նշեց, որ առաջիկայում բյուրոն ապահովագրություն իրականացնող ընկերություններում անցկացնելու է ստուգումներ։ Անդրադառնալով ԱՊՊԱ գործընթացի ներկա փուլին` նա գործընթացը կայացած գնահատեց։

«Այսօրվա դրությամբ` ԱՊՊԱ պայմանագիր է կնքել 83%-ը, 3%-ը մեքենան հանել է հաշվառումից, իսկ պայմանագիր չունեցողների թիվը 14% է։ Կարծում եմ, որ սա բավարար ցուցանիշ է, եւ առաջիկայում կանխատեսում ենք, որ ԱՊՊԱ գործընթացի ծավալները կմոտենան 90%-ի սահմանագծին»,- ասաց Վահան Ավետիսյանը: